ئەگەر بابەت بوو (پاشكەفت).. ئەم هەمی ل سەر (ئاینەكی)ـنە..؟!

کۆڤان حسێن

دبێژن ئەگەر بابەت بوو پارە هەمی مرۆڤ ل هەمی جیهانێ‌ دچنە سەر ئاینەكی، ئانكو پارە چونكە بەرژەوەندا كەسی یا مرۆڤی یا هەرە ب هێزە. ئەستەمە یان هەر نینە كەسەكی‌ بینی پارە پەرێس نە بیت ل گوشەكێ‌ ژ گوشێن ژیانێ‌ و پاشی ژی ل جیهانێ‌ جڤاكەكێ‌ بكاربەرێ‌ بێ‌ وژدان ئاڤا بوویە و هەر مالەكا نانویی بوویە ئاشەكێ‌ مەزاختنا بێ‌ بەرنامە و ڕەنگە بێ‌ مفا ژی، وەختێ بەحس ل‌ پاشكەفتی دهێتەكرن هەر تاكەكێ‌ ئەڤی وەلاتی (حاسیبا) خۆ دئینتەدەر ژێهەل و ژووردا حسابا خۆ دەتن و دەردكەڤیت ملیۆنێرەك (مع وقف التنفیس). ب راستی ئەڤێن كوردستانێ‌ ئاراستە دكەن ب زانین بیت یان نەزانین ل دەمێ‌ قەیرانێ‌ دا بخۆ (مینەكا) توقیت كری ل بەری خۆ دانا. پاشكەفتكرنا مووچا كو مافێ‌ هەر كەسێ‌ خودان موچەیە. بڕیارەكا ساخلەم نەبوو ل وی دەمێ‌ نە ساخلەم دا. ب هەر حالێ‌ هەی چونكە پاشكەفت یێ‌ هەمیانە و هەمی ژی پێدڤی ب وی كۆژمێ‌ پارەی نە یێ‌ هاتی پاشكەفت كرن، ئانكو دڤیابا وەك ماف نەكەڤیتە بەر مەقەسا و نەبیتە پرۆپاگەندەیا سیاسی و هەر ئێك بۆ ئەجندایێن خۆ بكار بینیت، ئەڤە پرسەكا وەلاتی ب گشتییە و هەمی ئالی وی دەمێ‌ د حكومەتێدا بوون و نوكە هەمی بزاڤێ دكەن بكەنە پاخلا ئالیەكی‌ بتنێ وەك چەكەكی‌ بكاربینن بۆ سوباهییا هەلبژارتنان. پارتی ژی پارە و پاشكەفت دڤێن و ب لۆژیكی ژی بیت پرانیا مووچە خۆرا پارتی نە و چ بزاڤەكا سادە و بێ‌ تامە دكەن وەسا دیاربكەن پارتی دژی پاشكەفتییە ئەڤە نە پۆپۆلیستییە. ئەڤە ئەو پەرێ‌ لاوازیێ‌ یە دوژمنێن سیاسییێن پارتی دكەن. پاشكەفت پڕسا پتری ئێك ملیۆن كەسایە و چ مالەك نینە ڤەدەر بیت. هندەكا ب شارەزایی پارتی دەربازی قوچەكا ئاسێ‌ كریە، كو حكومەتا پارتی پاشكەفتی نادەت. یا راست بیت ل گۆرەی زانستێ‌ بودجە و حساباتا دڤیا پارە بۆ پرسێ‌ بێتە دابینكرن . ب ئاسانترین زمان یاسا بودجێ‌ كوردستانێ‌ د شەلینیت و چ داهاتەكێ‌ بۆ ناهێلیت وەك گاز و گومرك و سنوور و بالەفڕخانە و هەتا نیڤەكا تابویێ‌ ژی دڤیا رادەست بكەتن. وەك داخازا هەمی ئالییان و ل سەر ئەڤێ‌ چەندێ‌ كوردستانێ‌ مولزم دكەن كو پاشكەفتی بدەتن، ئەڤە وەك ئیمام علی دبێژیت (كلمە حق یراد بیها باتل) پاشكەفت مافە و منەت نینە و حكومەت مولزەمە ئەڤی دەینی بدەتن وەك دەینێ‌ مقاولا و كومپانیا و فەرمانبەران. پاشی ئەگەر راستە حكومەتا شیعەیان دێ‌ هەیڤی ب ملیارا دۆلاران ڕەوانەی كوردستانێ‌ كەت وەك دبێژن پاشی هینگێ‌ دەرفەتا دانا پاشكەفتی هەیە، جاری هندی هەی بتنێ‌ گۆتنە و چ (زەمانەتەك) نینە نیڤەكا ڕێككەڤتنێ‌ ژی جهی خۆ بگریت. پاشەكەفت پڕسەكا هەرێمێ‌ یە ل پەرلەمانێ‌ داهاتییێ‌ كوردستانێ‌ فەرموون حكومەتێ‌ نەچار كەن پاشكەفتی بدەتن. ئەما دەرگەهـ ڤەكرنا هندێ‌ بەغدا بۆ كوردستانێ‌ فەرمانا بكەتن ئەڤێ‌ بكەن یان نەكەن . ئەڤە تاوانە ب كوردستانێ‌. هەمی ئالی و پارتی ژی دگەل فەرموون ل كوردستانێ‌ لوبیەكێ‌ ل پەرلەمانی دروست كەن و حكومەتێ‌ ئەگەر یا پارتی ژی بیت نەچاری دانا پاشكەفتی بكەن، ئەما خۆ مەزن كرن و گفاشتن ب هێزا خەلكێ‌ بێ‌ بەرهەمە و دێ‌ گران سەر خودانا راوەستیت. و مە پاشكەفت دڤێت ژ كوردستانێ‌ بیت نە ژ بەغدا، بەلێ‌ پشتی بەغدا كوردستانێ‌ پڕی پارە بكەت وەك هندەك دبێژن.