ب فەرمانا سوودانی ڕێڤەبەرێ بانکا بازرگانی یا عیراقێ ژ پۆستێ وی هاتە دوورئێخستن

پشتی نێزیکێ چار هەیڤ و نیڤان ژ دەستبکاربوونا(بیلال سەباح حوسێن حەمدانی) ڕێڤەبرێ بانکا بازرگانی یا عیراقێ (تى بی ئاى) ئەڤرۆ ژ پۆستێ وی هاتە دوورخستن.

حەمید نەعیم غزی، ئەمیندارێ گشتی یێ جڤاتا وەزیرێن عیراقێ ئەڤرۆ 12 خزیرانا 2023، نڤیسارەک ب فەرمانا دیوانی یا ژمارە 187 ئیمزا کر، کو پالپشت ب بڕیار و ڕازەمەندییا سەرۆکوەزیرێن عیراقێ بڕیاردا ب دوماهی هاتنا ئەرکێ بیلال سەباح حوسێن ژ پۆستێ سەرۆکێ بانکا بازرگانی یا عیراقێ (تى بی ئاى) و راسپاردنا محەمەد محەمەد جەواد کازم بۆ وی پۆستی.

بیلال سەباح حوسێن حەمدانی ل 24 کانوونا دووێ 2023، وەک سەرۆکێ بانکا بازرگانی یا عیراقی ل جهێ سالم جەواد چەلەبی دەستبکار ببوو.

بانکا بازرگانی یا عیراقێ (Trade Bank of Iraq) بانکەکا حکومییە، ل سالا 2003 ب کۆژمێ ملیۆنەک و 100 هزار دۆلارێن ئەمریکی ل بەغدا هاتیە دامەزراندن.