كوێستان محه‌مه‌د وه‌زیرا كار و كاروبارێن جڤاكى دیاركر، ئه‌وان ب پشته‌ڤانییا جڤاتا وه‌زیران ب تایبه‌تى مه‌سرور بارزانى سه‌رۆكێ حكومه‌تا هه‌رێما كوردستانێ كار بۆ پاراستنا مافێ كرێكاران كر، ئێك ژ كارێن كارنامه‌یا كابینه‌یا نوو یا حكومه‌تا هه‌رێما كوردستانێ گرنگیدانه ب كه‌رتێ تایبه‌ت و كرێكاران و دیجیتالكرنا حكومه‌تێ یه.
گوت ژى : سه‌رۆكێ حكومه‌تێ سه‌ره‌دانا وێ پرۆسێ كر، كا چه‌وا پرۆسه‌یا چاكسازى و رێكخستنا كاروبارێن ده‌سته‌به‌را جڤاكى و دیجیتالكرنا ئه‌رشیفێ رێڤه‌به‌رییا ده‌سته‌به‌رییا جڤاكى ب رێڤه دچیت.
ل دووڤ وه‌زیرا كار و كاروبارێن جڤاكى، نوكه پرۆسه د قووناغا ئێكێدایه، كو خوه د تۆماركرنا كه‌یسێن هه‌موو كۆمپانى و كرێكاراندا دبینیت، ل هه‌رێما كوردستانێ 42 هزار كه‌یس هه‌نه كو ل سه‌ر دهۆك، هه‌ولێر، سلێمانى، ئیداره‌یا سه‌ربه‌خۆیا سۆران و گه‌رمیان به‌لاڤبووینه.
كوێستان محه‌مه‌د راگه‌هاند ژى، د قووناغا ئێكێ دا ل هه‌ولێرێ نێزیكى شه‌ش هزار كه‌یسان هاتینه تۆماركرن، ل چه‌ند رۆژێن بهێن دێ ل سلێمانى، دهۆك، ئیداره‌یا سه‌ربه‌خۆ یا سۆران و گه‌رمیانێ ده‌ستپێكه‌ن، ئه‌گه‌ر پرۆسه ب ڤى شێوه‌یى ب رێڤه‌بچیت، ب كێمتر ژ سێ هه‌یڤان دێ تمام بیت و چیته قووناغه‌كا نوو.
وه‌زیرا كاروبارێن جڤاكى وه‌سا دبینیت، پرۆسه‌یا دیجیتالكرن و چاكسازى و رێكخستنا كاروبارێن ده‌سته‌به‌را جڤاكى، ده‌ستكه‌ڤته‌كێ گه‌له‌ك مه‌زنه بۆ كابینه‌یا نوو یا حكومه‌تێ و وه‌زاره‌تا وێ.
