بیلینگهام : ریال مه‌دریدێ دلێ من راوه‌ستاند، ده‌یك و بابێن من گراندن

ستێرا ئینگلیزى یا گه‌نج جۆد بێلینگهامى هووركارییێن گرێدانا هه‌ڤبه‌ستێ دگه‌ل یانه‌یا ریال مه‌درید یا ئسپانى هه‌تا هاڤینا سالا 2029ێ ئاشكراكرن.

ریال مه‌دریدێ بێلینگهام پێشكێشى ده‌زگه‌هێن راگه‌هاندنێ كر، یاریكه‌ر دێ درێسێ ژماره‌  پێنج دگه‌ل تیمێ ل به‌ر خوه‌ كه‌ت.

دپرێسكۆنفرانسێ پێشكێشكرنێدا بێلینگهامى ئاشكراكر، به‌رى 10 هه‌یڤان بابێ وى ئه‌و ل سه‌ر گرنگیدانا ریال مه‌دریدێ ئاگه‌هداركربوو، ل وى ده‌مى، وى هه‌ست ب له‌رزینێ كر و چه‌نده‌كێ دلێ وى راوه‌ستییا، لایه‌نێ دارایى بۆ وى یێ نه‌یێ گرنگ بوو، ژبه‌ركو ریال مه‌درید باشترین یانه‌یا جیهانێ یه‌، وى ب خۆ داخواز ژ كارگێرییا بورۆسیا دورتمۆندێ كر له‌زێ د دانوستانداندا بكه‌ت.

ئاماژه‌ ب هندێ دا، ئه‌و ل فینالا چامپیۆنز لیگێ یا سالا 2022ێ دناڤبه‌را ریال مه‌درید و لیڤه‌رپۆلدا به‌رهه‌ڤ ببوو، ئه‌و شه‌ڤه‌ بۆ وه‌رگرتنا بریارا گرێدانا هه‌ڤبه‌ستێ دگه‌ل ریال مه‌دریدێ یا ئێكلاكه‌ربوو.

زێده‌تر یاریكه‌رێ 19 سالى ئاشكراكر، به‌رپرسێن ریال مه‌دریدێ چوونه‌ مالا وان، ده‌مێ ده‌یك و بابێن وى به‌رپرسێن یانه‌یا شاهانه‌ دیتین ده‌ست ب گرییێ كر، ئه‌و كێم جاران دكه‌نه‌ گرى، لێ ئه‌و ده‌مه‌ بۆ وان یێ تایبه‌ت بوو، ژبه‌ركو هه‌رده‌م ده‌رفه‌تا په‌یوه‌ندیكرنێ ب ڤێ یانه‌یا مه‌زن ب ده‌ست ناكه‌ڤیت.

ل دۆر درێسێ ژماره‌ پێنج بێلینگهامى دیاركر، ئه‌و سوپاسییا ڤاییخوى دكه‌ت كو ئه‌ڤ ژماره‌ پێشكێشى وى كر، ئه‌و ب زێدانى یێ داخباره‌ و ئه‌ڤ ژماره‌ بۆ وى یا گرنگه‌.

دهێته‌ زانین جۆد بێلینگهامى به‌رامبه‌ر 103 ملیۆن یورۆیان دگه‌ل 30.9 ملیۆن یورۆیێن دى وه‌كو پاداشت ژ یانه‌یا بۆرۆسیا دورتمۆند یا ئه‌لمانى په‌یوه‌ندى ب ریال مه‌دریدێ كرییه‌.