عیراق دێ به‌نزینا تێكه‌ل دروست كه‌ت، دێ كارتێكرنه‌كا خراب ل سه‌ر ترۆمبێلان هه‌بیت

حكومه‌تا عیراقێ بۆ هندێ داكو ژ زیانێن دارایى دوور بكه‌ڤیت، دێ به‌نزینا ب كوالیتییا بلند ژ ده‌رڤه‌ى وه‌لاتى كریت و دگه‌ل نه‌فتێ تێكه‌ل كه‌ت، ئه‌ڤه‌ ژى دێ كارتێكرنێ ل سه‌ر كوالیتییا به‌نزینێ كه‌ت، دێ كارتێكرنه‌كا خراب بۆ ترۆمبێلان ژى هه‌بیت.

باسم نغێمش ئه‌ندامێ لژنه‌یا نه‌فت و گاز و سامانێن سروشتى ل په‌رله‌مانێ عیراقێ دیاركر، بۆ پركرنا كێمییا پێدڤییێن ناڤخۆ، عیراق دێ ژ ده‌رڤه‌ى وه‌لاتى لیترا به‌نزینێ ب 1200 دیناران كریت، عیراق رۆژانه‌ پێدڤى ب 30 ملیۆن لیترێن به‌نزینێ یه‌، به‌رهه‌مێ ناڤخۆ دگه‌هیته‌ نیڤا وێ ژمارێ.

باسم نغێمشى ئاشكراكر، حكومه‌تا عیراقێ بۆ هندێ داكو زیانێن ئابوورى نه‌بینیت، دێ به‌نزینا كوالیتییا وێ بلند ژ ده‌رڤه‌ى وه‌لاتى كریت و دگه‌ل ماده‌یێ نه‌فتێ و به‌رهه‌مێ ناڤخۆ تێكه‌ل كه‌ت، دووڤدا ب بهایێن جۆدا فرۆشیت، ژ وان 450 دینار یان 650 دینار یان 1000 دینار.

سه‌باره‌ت كارتێكرنا وێ به‌نزینێ ل سه‌ر ترۆمبێلان، ئه‌ندامێ لژنه‌یا نه‌فت و گازێ گوت : به‌نزینا موحه‌سه‌ یان كوالیتى بلند گه‌له‌ك ژ به‌نزینا نۆرمال جۆدایه‌، تشته‌كێ سروشتییه‌ كارتێكرنێ ل ترومبێلان بكه‌ت،  تێچوویێ به‌نزینا كوالیتى بلند ل سه‌ر حكومه‌تێ ب 1200 دیناران دراوه‌ستیت، له‌وما ژبه‌ر ئه‌گه‌رێن ئابوورى دێ دگه‌ل به‌نزینا دی تێكه‌ل كه‌ن.