مه‌سرور بارزانی پێشوازی ل شانده‌كێ ژوورا بازرگانییا ئەمریکی كر

ئەڤرۆ دوشەمبی  19 خزیرانا 2023 ێ ، مەسرور بارزانی سەرۆکێ حکومەتا هەرێما کوردستانێ، پێشوازی ل شانده‌كێ ژوورا بازرگانییا ئەمریکی کر.

د وێ کۆمبوونێ دا کو ئێرڤن هیکس کونسولێ گشتییێ ئەمریکا ل هەرێما کوردستانێ ئامادە ببوو، ستیڤ لوتس جێگرێ سەرۆکێ ژوورا بازرگانییا ئەمریکی بۆ کاروبارێن ڕۆژهەڵاتا ناڤین، کورتییه‌ك دەربارەیی ئارمانجێن سەردانا وان و پێکهاتێن وی شاندی به‌رچاڤ كرن” كو ژ نوونەرێن هژمارەكا کۆمپانی یێن ئەمریکی د بیاڤێ پێشخستنا چاندنێ دا پێکهاتبوون .

سەرۆکێ حکومەتێ، زێده‌باری سوپاسییان بۆ ویلایەتێن ئێکگرتی یێن ئەمریکا بۆ گرنگیدان ب هێزكرنا پەیوەندییان ل گەل هەرێما کوردستانێ ب رێیا کەرتێ تایبەت، رۆناهی خستە سەر چاکسازی یێن کابینا نه‌هێ د بیاڤێن هەمەجۆرکرنا ئابووری و گرنگیدان ب کەرتێ چاندنێ و ئاڤاكرنا ژێرخانه‌كا ئابوورییا ب هێز و کاراکرنا سیستەمێ بانکی و ب دیجیتالکرنا خزمەتگوزاری یێن گشتی .

سەرۆکێ حکومەتێ گۆت ژی: ئارمانجا مه‌ ئەوە، هەرێما کوردستانێ ببیتە سەنتەره‌كێ گرنگێ چاندنێ و بازرگانی ل ده‌ڤه‌رێ ب ئاراستەیا دابینکرنا ئاسایشا خوارنێ، هانا کۆمپانی یێن ئەمەریکی دا كو گرنگییێ ب وەبەرهێنانێ ل هەرێما کوردستانێ بدەن ب تایبەتی د بیاڤێ وزەیا نوو و کاروبارێن بانکی، ئامادەییا هەرێما کوردستانێ ژی بۆ پێشکێشکرنا هەر ئاسانکاری و هەماهەنگییەکا پێدڤی د وی باریدا ته‌كه‌ز کر.