نێزیكى 800 هزار ئاواره‌یێن عیراقێ ل هه‌رێما كوردستانێ هه‌نه و 300 هزار ژ وان ل پارێزگه‌ها دهۆكێنه، سه‌رۆكێ لژنه‌یا كوچ و كوچبه‌ران ل په‌رله‌مانێ عیراقێ دبێژیت : نه‌بجهئینانا رێككه‌ڤتنا شنگالێ و نه‌بوونا پلانه‌كا گۆنجاى ل ده‌ڤ حكومه‌تا عیراقێ، ئه‌گه‌رێن نه‌ڤه‌گه‌ریانا ئاواره‌یانه.
شه‌ریف سلێمان په‌رله‌مانتارێ پارتى و سه‌رۆكێ لژنه‌یا كۆچ و كۆچبه‌ران ل په‌رله‌مانێ عیراقێ بۆ ئاژانسا خانى ئاشكراكر، نه‌بجهئینانا ریككه‌ڤتنا شنگالێ ئاریشه و ئاسته‌نگا هه‌ره مه‌زنه ل پێشییا ڤه‌گه‌ریانا ئاواره‌یان، ئێك ژ ئه‌گه‌رێن دى ئه‌وه كو هه‌تا نوكه حكومه‌تا عیراقێ ئه‌و پرۆگرام و پلانێن پێدڤى بۆ ڤه‌گه‌راندنا ئاواره‌یان نه‌داناینه و ئه‌و رژدییه بۆ ڤه‌گه‌ریانێ ل ده‌ڤ حكومه‌تا فیدرالییا عیراقێ ناهێته دیتن.
ئاماژه ب هندێ ژى دا، گه‌له‌ك ژ وان ده‌ڤه‌رێن خه‌لك ژێ ئاواره بووی، هه‌تا نه‌كو نه‌هاتینه ئاڤه‌دانكرن و خزمه‌تگوزارییێن سه‌ره‌كى وه‌كو خوارن و ئاڤا ڤه‌خوارنێ و كاره‌ب و ئێمناهى ل وان جهان نه‌هاتینه دابینكرن.
زێده‌تر شه‌ریف سلێمانى دیاركر، به‌رى پرۆژه‌قانوونا بودجه‌یا عیراقێ بهێته په‌سه‌ندكرن، ئه‌وى ل جڤاتا نوونه‌ران ب نڤیساره‌كا فه‌رمى و ئیمزایا 86 په‌رله‌مانتاران داخواز ژ سه‌رۆكایه‌تییا په‌رله‌مانى كر، 50 ملیار بۆ دابینكرنا خیڤه‌ت و كه‌لوپه‌لێن خوارنێ و كاره‌بێ ته‌رخانبكه‌ت، لێ ئه‌و داخوازه ب بهانه‌یا هندێ هاته ره‌تكرن، كو وه‌زاره‌تا كۆچ و كۆچبه‌ران میزانییه‌كا باش هه‌یه و دڤێت ئه‌ڤ كاره ژلایێ وێ وه‌زاره‌تێڤه بهێته‌كرن.
هه‌روه‌سا گوت : دنوكه‌دا بارگرانییا سه‌ره‌ده‌ریكرن و ب رێڤه‌برنا ئاواره‌یان هه‌موو ل سه‌ر ملێن حكومه‌تا هه‌رێما كوردستانێیه، حكومه‌تا عیراقێ ئه‌و كارێ ل سه‌ر ملێن وێ پێدڤى ناكه‌ت، هه‌روه‌سا رێكخراوێن مرۆڤى یێن جیهانى ژى گه‌له‌ك ژ وان ژبه‌ر شه‌رێ رووسیا و ئوكرانیا كه‌ڤتینه دقه‌یراناندا و ژعیراقێ ده‌ركه‌ڤتینه، پێشبینى دهێته‌كرن ئه‌وێن ماین ژى هه‌تا دووماهییا ئه‌ڤ ساله بچن، بارگرانییا ل سه‌ر ملێن حكومه‌تا هه‌رێما كوردستانێ دێ مه‌زنتر لێهێت.
