د هه‌وار نێروه‌یی: ئه‌لمانیا هه‌رده‌م ڤییایه‌ پشته‌ڤانییێ ل هه‌رێما كوردستانێ بكه‌ت

ئاژانسا خانی:

د. هه‌وار نێروه‌یی، راگرێ كۆلیژا زانستێن سیاسی ل زانكۆیا دهۆكێ” بۆ ئاژانسا خانی دیار كر: پێگه‌هێ ئه‌لمانیا د ئێكه‌تییا ئورۆپا دا گه‌له‌ك یێ دیار و به‌رچاڤه‌، گه‌له‌ك جاران ئه‌لمانیا دهێته‌ هژمارتن، ب هه‌ڤبه‌ر كرن ل گه‌ل پێنج وه‌لاتێن زلهێزێن جیهانێ ( 5+1)‌، هه‌روه‌سا د شه‌رێ تیرۆریستێن داعشێ دا هه‌تا نوكه‌، سه‌نگێ ئه‌لمانیا د بیاڤێ ئابووری و سیاسی و له‌شكه‌ری دا ل سه‌ر هه‌رێما كوردستانێ گه‌له‌ك یێ دیار و ئاشكرا یه‌، دیسان كاریگه‌رییا ئه‌لمانیا بۆ ژناڤبرنا داعشێ گه‌له‌ك یێ دیاره‌ و رۆله‌كێ مه‌زن گێرایه‌ و گه‌له‌ك پشته‌ڤانییا هێزێن پێشمه‌رگه‌یێ كوردستانێ و حكومه‌تا هه‌رێما كوردستانێ كرییه، هه‌روه‌سا چه‌ندین به‌رسێن پایه‌ بلندێن ئه‌لمانیا سه‌ره‌دانا هه‌رێما كوردستانێ كرینه‌ و دیسان چه‌ندین جاران ژی به‌رپرسێن هه‌رێمێ سه‌ره‌دانا ئه‌لمانیا كرینه‌، ئه‌ڤه‌ وێ چه‌ندێ دگه‌هینیت كو پشته‌ڤانییا ئه‌لمانیا بۆ هه‌رێما كوردستانێ د چارچۆڤێ سیاسی و ئابووری و له‌شكه‌ری دایه‌، هه‌روه‌سا ئه‌لمانیا پشته‌ڤانییێ ل سازی یێن حكومه‌تا هه‌رێما كوردستانێ دكه‌ت، ب تایبه‌تی ژی ده‌مێ هه‌رێما كوردستانێ دكه‌ڤیته‌ د قه‌یرانان دا، كو حكومه‌تا عیراقا فیدرالی، كو نه‌ حكومه‌ته‌كا فیدرالییه‌ و چه‌ندین ئالۆزییان بۆ هه‌رێما كوردستانێ چێدكه‌ت، دیسان ب ده‌هان رێككه‌فتن دناڤبه‌را هه‌رێمێ و به‌غدا دا هاتینه‌ كرن، به‌لێ عیراقێ ئه‌و رێككه‌فتنه‌ بجهنه‌ئیناینه‌، به‌لێ هه‌كه‌ حكومه‌ته‌كا وه‌كو ئه‌لمانیا گڤاشتنان ل سه‌ر حكومه‌تا عیراقێ دروست بكه‌ت، ل وی ده‌می دێ حكومه‌تا عیراقێ ژی پێداچوونێ د بریار و رێككه‌فتنێن خۆدا كه‌ت ل هه‌مبه‌ری هه‌رێما كوردستانێ.

ناڤهاتی گۆت ژی: سه‌ره‌دانا نێچیرڤان بارزانی” سه‌رۆكێ هه‌رێما كوردستانێ بۆ وه‌لاتێ ئه‌لمانیا” درێژه‌ پێدانا وان سه‌ره‌دانێن دیتره‌ ئه‌وێن به‌ری نوكه‌ هاتینه‌ كرن”  هه‌م یێن ژ لایێ ئه‌لمانیا بۆ هه‌رێمێ هاتینه‌ كرن و هه‌م ئه‌و سه‌ره‌دانێن هه‌رێما كوردستانێ بۆ ئه‌لمانیا هاتینه‌ كرن” له‌وما ئه‌ڤ جۆره‌ سه‌ره‌دانه‌ مه‌سجه‌كێ دده‌نه‌ مه‌، كو ئه‌ڤ وه‌لاتێن خودان پێگه‌هه‌كێ تایبه‌ت به‌رده‌وام پشته‌ڤانییێ ل هه‌رێما كوردستانێ دكه‌ن” دیسان پشتی داعشێ هێرش ئیناینه‌ سه‌ر خه‌لكێ ب سه‌دان هزار ئاواره‌ و په‌نابه‌ر هاتنه‌ هه‌رێما كوردستانێ، ئه‌لمانیا د وارێ سایكولۆژی دا پشته‌ڤانی ل وان ئاواره‌ و په‌نابه‌ران كرییه‌، هه‌روه‌سا به‌ری چه‌نده‌كێ وه‌زیرێ ده‌رڤه‌یێ ئه‌لمانیا سه‌ره‌دانا كه‌مپێن ئاواران ل هه‌رێما كوردستانێ كرییه‌” ئه‌ڤه‌ وێ چه‌ندێ دگه‌هینیت” كو ئه‌لمانیا دڤێت پشته‌ڤانیا هه‌رێما كوردستانێ بكه‌ت، ب تایبه‌تی ژی ده‌مێ هه‌رێما كوردستانێ تووشی ئاریشه‌ و قه‌یرانان دبیت، ئه‌لمانیا وه‌سا دبینیت، كو ئه‌و ئاریشه‌ یێن كوردستانێ هه‌ین” یێن ئه‌لمانیا ژی نه‌، چونكی ئه‌و خۆ بخودانا وان ئاریشان دبینیت” له‌وما ئه‌لمانیا دڤێت وان ئاریشان چاره‌سه‌ر بكه‌ت.