سكرتێرێ یانهیا دهۆكێ راگههاند، وان ل ئێكهتییا فوتبۆلا عیراقێ تانهیهك ل ئهنجامێ یارییا بهرامبهر یانهیا قاسم دایه، كو یارى ب وهكههڤییا بێ گۆل ل یاریگهها كهربهلا ب دووماهى هاتبوو.
ل یارییا دهۆك و مێڤاندارا وێ یانهیا قاسم ژ ههڤركییێن گهرا 33ێ ژ خۆلا نایابا عیراقێ، دهستپێكرنا یارییێ ژبهر گیروبوونا ئهمبۆلانسێ بۆ ماوێ 15 خۆلهكان گیروببوو.
جاسم حاجى سكرتێرێ یانهیا دهۆكێ بۆ ئاژانسا خانى دیاركر، وان ل ئێكهتییا فوتبۆلا عیراقێ تانهیهك ل ئهنجامێ یارییا بهرامبهر یانهیا قاسم دایه، دڤێ روودانێدا چ شاشى ژلایێ وانڤه نههاتینه كرن، ل دووڤ بۆردێ ئێكهتییا فوتبۆلا عیراقێ، ههر دهمێ ترۆمبێلا ههوارهاتنێ بۆ ماوێ 15 خۆلهكان گیروبیت، دڤێت یارى بهێته ههلوهشاندن و یا پێدڤى بوو ئهڤ بریاره ژلایێ دادڤانیڤه هاتبا دان، پشتى جهژنێ لژنهیا بریاردانێ ل ئێكهتییا عیراقێ دێ كۆمبیت و بریارێ ل سهر ڤى بابهتى دهت، ئهو دگهشبینن بریار دبهرژهوهندییا یانهیا دهۆكێدا بهێتهدان و سێ خال بۆ بهێنه هژمارتن.
ژلایهكێ دیڤه جاسم حاجى ل دۆر خۆلا نوو یا عیراقێ ئهوا دێ بناڤێ خۆلا پیشهكاران هێته ب رێڤهبرن دیاركر، ههتا نوكه چ نامه ژ ئێكهتییێ نهگههشتینه وان و چ یانهیێن دى، و مهرجێن پشكداریكرنێ دخۆلێدا بۆ وان نههاتینه دیاركرن، لێ ئهو دبهرههڤن و ههموو مهرجێن پشكداریكرنێ ل دهڤ یانهیا دهۆك ههنه و دێ شێت پشكدارییێ كهت.
