د. هاڤین کەمال: هندەک ئەگەرێن سەرسۆرهێنەر هەنە بۆ پەیدابوونا ئێشان د لەشێ مرۆڤی دا

ئاژانسا خانی:

د. هاڤین که‌مال، بسپۆر د زانستێ ئێش و به‌نجێ دا، بۆ ئاژانسا خانی دیار کر: هندەک ھۆکارێن سەرسۆرھێنەر هەنە، بۆ دروستبوونا ئێشان د لەشێ مرۆڤی دا، ب تایبەتی دەمێ مرۆڤ نەعالێ و پێلاڤا نەگونجایی، وەکو سەندەلێ و نەعالا لاستیکی و پێلاڤەکا تەنگ دکەتە پێخۆ، دێ پیێن مرۆڤی ئێشن، هه‌روه‌سا گەلەک ب کارئینانا مۆبایلا سمارت و  نڤێسینا تێکست و نامان ب بەردەوامی دێ بیتە ئەگەرێ ئێشانا تبلێن دەستی و ھەروەسا ملێن مرۆڤی، لەوما ھەر دەمێ تە ھەست ب ئێشانێ کر بێهنا خۆ بدە، دیسا دانانا جزدانکا پاران، د بەریکا پشتێ یا پەنتەرۆنیدا، دبیتە ئەگەرێ دروستبوونا ئێشانا پشتێ، ھەروەسا ئێش دگەهیتە پشکا خوارێ یا پێیان، ئەو ژی ب ئەگەرێ خستنا فشارێ ل سەر دەماران ( سایەتیک ) کو د وی جهی دایە، رۆژ ب رۆژ، ھەروەسا دبیت شێوازێ سروشتی یێ راوەستیانا گەهێن پشتێ ژی تێک بدەت، لەوما باشترە بەری روونشتنێ جزدانکا خۆ بینیەدەر.

د. هاڤینێ گۆت ژی: روونشتنا خەلەت ل دەمێ هاژۆتنا  ترۆمبێلێ، ئازاران دروست دکەت، ب رەنگەکێ دانانا کورسییێ ترۆمبێلێ ب گۆشەکا خەلەت دا وە دکەت کو بچییه‌ پێشڤه‌ بۆ گرتنا ستێرنی، لەوما دێ ئێشانا ناڤملان  بۆ تە دروست کەت، بۆ هندێ تووشی ڤێ چەندێ نەبی، پێدڤییە ب رێکوپێکی کوشنێ ترۆمبێلا خۆ بدانی ب گۆشەیەکا راوەستیایی، دڤێت ب ساناهی دەستێ تە بگەهیتە ستێرنی، هەروەسا ھندەک یارییێن ئەلکترۆنی ژی لڤینێن وان وەکو یێن  ھندەک جۆرێن وەرزشینە، دبیت ببنە ئەگەرێ بریندارکرنا گرێکان و پەقینا گەهان ھندەک جاران شکاندنا وان ژی.

هێشتا دبێژیت: ئەو کەسێن گەلەک حەز ژ خوارنا پەنیری دکەن، دبیتە ئەگەرێ سەرئێشانێ بۆ وان، ب تایبەتی پەنیرێن وەکو شیدەر، پارمیزان، سویسری و ئەوێن گەلەک مادێ (تایرامین ) تێدا، ھەروەسا ئەو مادێن کو سەرئێشانێ دروست دکەن، د ھندەک گۆشتێ دروستکری دا و یێن د  قۆدیکان دا و ھدەک ڤەخوارنێن وەکو بیرێ یان مادێن کحولی ھەبن، مرۆڤ دشێت خۆ ژێ دوور بکەت، هه‌روه‌سا دەمێ بەرێخودانا تیڤییێ یان بهێنڤەدانێ ب رەنگەکێ خەلەت، دبیت پشت ئێشانێ دروست بکەت، یان شێوازێ ھەلگرتنا لاپتۆپی ل سەر ئێک ملی، یان ب دەستی، دێ ئازاران بۆتە دروست کەت، لەوما باشترە جانتەکێ ب کار بینی، کو ھەردو ملێن تە بگریت، یان زوو زوو جانتێ ب گوهۆری.

د. هاڤینێ دیار کر ژی: گرێدانا توند یا پرچی لدەف ژنان، دبیت سەرئێشانێ دروست بکەت، یان ئەوێن شەقیقە هەین، ھەستیارترن بەرامبەر لاستیکێن پرچی، کولاڤێن تەنگ و توند، باشترە ئەو پرچێ خۆ گرێنەدەن و بەردەن، هەروەسا شێوازێ خەوا نەرێکخستی، ئەوێن لسەر دەڤی دنڤن و ل سەر گەدەیێ خۆ، یان ل سەر رەخەکێ، ھەردەم ئازار بۆ وان دروست دبیت، باشترین رێک بۆ نڤستنێ ل سەر پشتێ یە، یان ژی ب شێوێ دەمێ زارۆک د زکێ دایکێ دا، ڤەخوارنێن ئەلکحولی، ب تایبەتی شەرابا سوور ، ویسکی ، بیرە ، شەمپانیا، باشترە نەڤەخۆیی، یان بهێنە کێم کرن، هەروەسا

نەخوارنا دانەکێ، دبیتە ئەگەرێ داکەفتنا ئاستێ شەکرا لەشی، لدەف هندەک کەسان، دبیتە ئەگەرێ سەرئێشەکا زۆر بێی کو بزانیت کو ئەو ئەگەر برسیبوونە، لەوما باشترە دانێن خوارنێ رێکبێخی و خوارنا ب مفا ب خویی، دیسان ئاریشێن چاڤی و کێم دیتن هندەک جاران دبنە ئەگەرێ سەرئێشانێ، لەوما باشترە ھەردەم پشکنینان بۆ بکەیی، هەلگرتنا تشتێن گران ب رێیا خەلەت خرابترین شێوازێ چەماندنێ بۆ سنگییە بۆ ھەلگرتنان تشتان، لەوما پشتا خۆ راست بکە، باشترین شێواز چەماندنا جۆکی و حەوزێیە بۆ ھەلگرتنا تشتان” هه‌روه‌سا سترێس و گەلەک هزرکرن هەردەم دێ تە ئازار دەت و گەلەک سکس کرن، دبیت فشارا خوینێ بلند بکەت و کاریگەری ھەیە ل سەر گرژبوونا ماسوولکێن ملی، ئەڤ چەندە لدەف زەلامان پترە ژ ژنان.