ئه‌ڤرۆ 10-7-2023ێ نێچیرڤان بارزانى سه‌رۆكێ هه‌رێما كوردستانێ پێشوازى ل سه‌ركه‌ڤتییێن ئێكێ و دووێ و سێیێ یێن ئاماده‌یى ل سه‌ر ئاستێ هه‌رێما كوردستانێ و دایك و باب و كه‌سوكارێن وان كر.
د دیداره‌كێدا كو وه‌زیرێ په‌روه‌ردێ یێ هه‌رێما كوردستانێ و ژماره‌یه‌كا به‌رپرسێن وه‌زاره‌تێ تێدا به‌رهه‌ڤببوون، سه‌رۆك نێچیرڤان بارزانى ئاخڤتنه‌ك پێشكێشكر و ب گه‌رمى پیرۆزباهى ل سه‌ركه‌ڤتیان كر و هیڤییا سه‌ركه‌ڤتنێ بۆ خواست.
دووپاتكر، دگه‌ل خێزان و كه‌سوكارێن وان، هه‌رێما كوردستانێ ب گشتى شانازییێ ب وان دكه‌ت، و پشتراستییا دابینكرنا سكووله‌رشیب بۆ هه‌موو سه‌ركه‌ڤتییێن ئێكێ و دووێ و سێیێ یێن ئاماده‌یى ل ئه‌ڤ ساله ل سه‌ر ئاستێ هه‌رێما كوردستانێ دا، داكو ل زانكۆیێن ناڤخۆ و ده‌رڤه به‌رده‌وامییێ ب خواندنێ بده‌ن، بۆ ڤێ مه‌ره‌مێ ژى وه‌زیرێ په‌روه‌ردێ راسپارد كارێ پێدڤى بكه‌ت.
سه‌رۆك نێچیرڤان بارزانى سوپاسى و پیرۆزباهى ل كه‌سوكارێن سه‌ركه‌ڤتییان و مامۆستایان و وه‌زیرێ په‌روه‌ردێ و ستافێ وه‌زاره‌تێ كر و وه‌كو پشكه‌كا ڤێ سه‌ركه‌ڤتنێ ل قه‌له‌مدان، دووپاتى ل هندێ ژى كر، سه‌ركه‌ڤتییێن ئاماده‌یى ل وى ئاستێ بلند سه‌ركرده‌یێن پاشه‌رۆژا وه‌لاتینه و دشێن خزمه‌تا گه‌ل و وه‌لاتێ خوه بكه‌ن، هه‌روه‌سا رێز و پێزانین بۆ شه‌ڤ هشیارى و وه‌ستیانا سه‌ركه‌ڤتییان ده‌ربرین.
ژلایێ خۆڤه ئالان حه‌مه سه‌عید وه‌زیرێ په‌روه‌ردێ و سه‌ركه‌ڤتییان و كه‌سوكارێن وان، سوپاسى و پێزانین بۆ سه‌رۆكێ هه‌رێما كوردستانێ سه‌باره‌ت سكووله‌رشیب و پشته‌ڤانییا وى ده‌ربرین.
د دیدارێدا چه‌ند هزر و سه‌رنج و تێبینى ده‌رباره‌ى پرۆسه‌یا خواندنێ و ئاریشه‌یێن وێ ب گشتى و ده‌رفه‌تا كارى بۆ ده‌رچوییێن زانكۆیان و چه‌ند بابه‌تێن دى یێن په‌یوه‌ندیدار ب خواندنێ و پرۆسه‌یا په‌روه‌ردێ هاتنه روونكرن.
سه‌رۆك نێچیرڤان بارزانى د ئاخڤتنێن خوه‌دا گوت :
هه‌موو لایه‌ك ب خێر بهێن، ژ هه‌ر جهه‌كێ كوردستانێ هاتبن، ب خێر بهێن سه‌رچاڤان، من دڤێت پیرۆزباهییه‌كا گه‌رم ل هه‌وه هه‌موویان بكه‌م، هیڤیدارم سه‌ركه‌ڤتى و سه‌رفه‌رازبن، هه‌وه قووناغه‌كا گه‌له‌كا گرنگ یا ژیانا خوه ب سه‌ركه‌ڤتى تمامكر، هیڤیدارم قووناغێن دى یێن خواندنا هه‌وه هه‌ر وه‌كو یا نوكه ب سه‌ركه‌ڤتى و خۆشى تمام ببن.
بێى پشته‌ڤانییا خێزانێن هه‌وه، دایك و باب و كه‌سوكارێن هه‌وه، پشتراستم هوون نه‌دشیان ئه‌ڤرۆ وێ سه‌ركه‌ڤتنێ بده‌ستڤه‌بینن، پیرۆزباهی و ده‌ستخۆشى و سوپاسییه‌كا گه‌رم ل مالباتێن هه‌وه دكه‌م، هیڤیدارم ئه‌وژى سه‌رفه‌راز و سه‌ركه‌ڤتى بن.
هه‌وه ئه‌ڤ قووناغه یاكو هێلاى و هوون برینه د قووناغه‌كا نوو یا خواندنێدا، ب پشتراستیڤه وه‌ستیانه‌كا مه‌زن دیت هه‌تا بده‌ستڤه‌ئیناى، ب راستى ئه‌م شانازییێ ب هه‌وه دبه‌ین، ئه‌ڤرۆ كوردستان پێدڤى ب هه‌وه‌یه، قووناغا ئه‌ڤرۆ یا كوردستانێ پێدڤى ب هه‌و‌یه ب چه‌كێ قه‌له‌مى و ب چه‌كێ زانستێ خوه، پر چه‌ك بكه‌ن.
هوون پاشه‌رۆژا ڤى وه‌لاتى نه، پاشه‌رۆژا ڤى وه‌لاتى د ده‌ستێن هه‌وه‌دایه، ئه‌ڤرۆ جهێ خۆشحالییێ بوو من دیت كو دهاتنه ژوورڤه و هه‌تا راده‌یه‌كێ مه‌زن كچ و ژن دناڤ وان سه‌ركه‌ڤتییاندا دیاربوون، ئه‌ڤه ژى جهێ شانازییێ یه.
پاشه‌رۆژا ڤى ملله‌تى د ده‌ستێن هه‌وه‌دایه و پاشه‌رۆژا ڤى ملله‌تى دڤێ قووناغێدا زانست و خواندنه، خۆ پێگه‌هاندنه بۆ هندێ ئه‌مژى بگه‌هینه كاروانێ وان وه‌لاتان یێن پێشكه‌ڤتین، ئه‌وى ئالاى هه‌لبگرن و كوردستانێ بلند بكه‌ن، به‌ره‌ڤ پێشڤه و قووناغه‌كا نوو ببه‌ن و پاشه‌رۆژ یا هه‌وه‌یه.
سوپاسییا جه‌نابێ وه‌زیر و جێگرێ وه‌زیرى و هه‌موو وان به‌رێزان دكه‌م، یێن ب هه‌ر شێوه‌یه‌كى دگه‌ل هه‌وه وه‌ستیاین، به‌لی سوپاسییه‌كا تایبه‌ت ژى بۆ مامۆستایێن هه‌وه هه‌یه، ل ڤێری من دڤێت ده‌نگێ خوه بگه‌هینمه وان و سوپاسییا وان بكه‌م و بێژمێ : سوپاسییا هه‌وه دكه‌ین بۆ وێ وه‌ستییانێ، سوپاسییا هه‌وه دكه‌ین كو ئه‌و ره‌وشا نه‌خۆش یا هه‌ى، هه‌وه قه‌د نه‌هێلا پرۆسه‌یا خواندنێ ل كوردستانێ بهێته راگرتن و یا به‌رده‌وامبوو.
پشتراستبن هوون جهێ شانازییێ نه بۆ كوردستانێ ب هه‌موو پێكهاته‌یانڤه، ئه‌ڤ ئه‌مانه‌ته د ده‌ستێن هه‌وه‌دایه و ب هه‌موو هێز و شیانانڤه ئه‌ڤى ئه‌مانه‌تى وه‌ربگرن و به‌ره‌ڤ پێش ببه‌ن، هیڤیدارم هوون هه‌موو ته‌مه‌ن درێژبن و دژیانا خوه‌دا د سه‌ركه‌ڤتى بن. جاره‌كا دى بخێربهێن.
