كۆمپانییا دیلۆیت ئامارێن به‌رهه‌مئینان، هنارده‌كرن، خه‌رجى و فرۆتنا نه‌فتا هه‌رێما كوردستانێ بۆ چارێكا ئێكێ یا ئه‌ڤ ساله 2023ێ به‌لاڤكرن.
ل دووڤ راپۆرته‌كا كۆمپانییا دیلۆیت، سه‌رجه‌مێ به‌رهه‌مێ نه‌فتێ 36 ملیۆن و 723 هزار و 475 به‌رمیل بوون، رێژه‌یا هنارده‌كرنێ ب 32 ملیۆن و 307 هزار و 382 به‌رمیلان هاتییه دانان، رێژه‌یا ته‌رخانكرنێ بۆ پالاوگه‌هێ ،چار ملیۆن و 39 هزار و 232 به‌رمیل بوون، هه‌روه‌سا رێژه‌ی فرۆتنا ناڤخۆ 376 هزار و 861 به‌رمیلن.
د راپۆرتێدا هاتییه، داهاتێ گشتییێ نه‌فتێ ل هه‌رێما كوردستانێ دوو ملیار و 199 ملیۆن و 684 هزار و 396 دۆلار بوون، د ده‌مه‌كیدا رێژه‌یا بهایێ ئێك به‌رمیل 67.639 دۆلار بوون، ژ ڤێ رێژه‌یێ ژى داهاتێ ناڤخۆ 22 ملیۆن و 98 هزار و 456 دۆلار بوون و سه‌رجه‌مێ بهایێ ئێك به‌رمیل ژى 58.638 دۆلار بوون.
راپۆرتا كۆمپانییا دیلۆیت ئه‌وژى دیاركر، خه‌رجییێ پرۆسه‌یا نه‌فتێ ل چارێكا ئێكێ یا ئه‌ڤ ساله، ئێك ملیار و 253 ملیۆن و 187 هزار و 254 دۆلار بوون، ئه‌و پاره‌یێ ژ كۆژمێ دیاركرى بۆ حكومه‌تێ ماى كو بۆ مووچه‌یێ مووچه‌خۆران هاتییه ته‌رخانكرن، 946 ملیۆن و 497 هزار و 142 دۆلار بوون.
راپۆرتێن كۆمپانییا دیلۆیت ژ چارچووڤێ پرۆسه‌یا ووردبینییێ ل كه‌رتێ نه‌فت و گازێ ل هه‌رێما كوردستانێ وه‌كو پشكه‌ك ژ ده‌ستپێشخه‌رییا تایبه‌ت ب شه‌فافییه‌تێ ل به‌رنامه‌یێ كارێ حكومه‌تا هه‌رێما كوردستانێ، هه‌ر چار هه‌یڤان جاره‌كێ راپۆرتا پشتراستكرنێ ب داتا و زانیارییێن نوو ل دۆر ( هنارده‌كرن، بكار ئینان، خه‌رجى و داهاتێ نه‌فتێ ) دهێنه به‌لاڤكرن.
