وه‌رگرتنا گه‌نمى ل سایلۆیێن هه‌رێما كوردستانێ ب دووماهى هات، ل دهۆكێ 125 هزار ته‌ن، ل هه‌ولێرێ 145 هزار و ل سلێمانییێ 230 هزار ته‌نێن گه‌نمێ جۆتیاران هاتنه وه‌رگرتن، رێڤه‌به‌رێ گشتییێ بازرگانییێ ل وه‌زاره‌تا بازرگانى دبێژیت: به‌غدا سۆزدایه ل ڤان نێزیكان پاره‌یێ گه‌نمى ب هنێریت.
نه‌وزاد شێخ كامل رێڤه‌به‌رێ گشتییێ بازرگانى ل وه‌زاره‌تا بازرگانی و پیشه‌سازییا هه‌رێما كوردستانێ دیاركر، پشكا هه‌رێما كوردستانێ بۆ گه‌نمێ ئه‌ڤ ساله 500 هزار ته‌ن بوون، پرۆسه ب دووماهى هات و هه‌موو ئه‌و گه‌نمێ بۆ جۆتیارێن هه‌رێما كوردستانێ هاتییه دانان، هاته وه‌رگرتن.
ئه‌و 500 ته‌نێن گه‌نمێ جۆتیارێن هه‌رێما كوردستانێ یێن كو ژلایێ حكومه‌تا عیراقێڤه هاتینه وه‌رگرتن ب ڤى شێوه‌ى ب سه‌ر پارێزگه‌هاندا بوو، 230 هزار ته‌ن ژ پارێزگه‌هێن سلێمانى و هه‌له‌بجه، 145 هزار ته‌ن ژ پارێزگه‌ها هه‌ولێرێ و 125 هزار ته‌ن ژ پارێزگه‌ها دهۆكێ.
نه‌وزاد شێخ كاملى ئاشكراكر، ئه‌و گه‌نمێ ماى و ژ جۆتیاران نه‌هاتییه وه‌رگرتن، هه‌ردوو كۆمپانییێن خۆشناو و قه‌یوان دێ ژ جۆتیاران وه‌رگرن و شیانێن وه‌رگرتنا 200 هزار ته‌نێن گه‌نمى هه‌نه.
