ئاواره‌یێن مووسلێ دشێن ل نێزیكى دهۆكێ ده‌نگێ خوه‌ بده‌ن

بەرپرسێ نڤیسینگەھا ھەلبژارتنێن پارتی ل باژێڕێ مووسل ئاشکراکر، ئاوارەیێن مووسلێ ماف ھەیە ل بنگەھێن دەنگدانێ یێن نێزیکی دھۆکێ پشکداری پرۆسا ھەلبژارتنان ببن و ڤەنەگەڕن بۆ ناڤا سەنتەرێ باژێڕێ مووسل.

مەناف حەسەن، بەرپرسێ نڤیسینگەھا ھەلبژارتنێن پارتی ل مووسل بۆ ئاژانسا دیارکر، ئاوارەیێن ل ھەرێما کوردستانێ نەشێن دەنگێ خوە ل ھەرێما کوردستانێ بدەن و دڤێت ڤەگەڕن بۆ مووسڵ، بەلێ ئەو ئاوارەیێن ل دھۆکێ ئاکنجینە دشێن خوە ڤەگوھێزێن بۆ بنگەھێن دەنگدانێ یێن نێزیکی باژێڕێ دھۆکێ، چەندین بنگەھێن تۆمارکرنێ نێزیكى دھۆکێ وەکو فەیدییێ، جه‌مبوور، دومیز، تل عەدەس و شێخان، ئالقوش و ھەموو دەڤەرێن نێزیکی دھۆکێ ھەنە ، ھەر ئاوارەیەکێ بخوازیت ل رۆژا دەنگدانێ نەچیتە مووسلێ، دێ دشێت ل بنگەھێن دیارکری دەنگێ خوە دەت.

مەناف حەسەن گۆتژی، گورەی قانوونا ھەلبژارتنان ئەو بڕیارە دەنگدەرێن سەر ب قەزا شنگالێڤه‌ ناگریت و ئاوارەیێن شنگالێ یێن دەرڤە و ناڤا کەمپان دشێن ل جھێ ئاوارەبوونێ پشکدارییێ د ھەلبژارتناندا بکەن و دەنگێ خوە بدەن، نوکە کۆمیسیۆنێ دەست ب نووکرنا تۆمارا دەنگدەران کرییە و پێدڤییە دەنگدەر سەرەدانا بنگەھێن کۆمیسیۆنێ بکەن.