مۆزەخانەکا کەلەپووری دێ ل پەرستگەھا لالش ھێتە دروستکرن

ئاژانسا خانی:

سەرپەرشتێ پرۆژێ نووژەنکرنا پەرستگەھا لالش دیار کر، خانا ئێزی ل پەرستگەھا لالش دێ بیتە مۆزەخانا کەلەپووری و ھەموو جۆرێن کەلەپووری یێن ئێزدیان دناڤدا دێ ھێنە پاراستن، پشتی خانا ئێزی دھێتە نووژەنکرن دێ دەست ب بجهئینانا وی پرۆژه‌یی ھێتە کرن و مۆزەخانا کەلەپووری ل پەرستگەھا لالش دێ بیتە ئەگەرێ هندێ كو پتر کەلەپوورێ ئێزدیان بھێتە پاراستن و دەمێ خه‌لك و شاندێن بیانی قەستا لالشێ دکەن دێ کەلەپوورێ ئێزدیان ژی بینن و ھەروەسا بۆ گەشتوگوزارییا ئولی ژی وێ موزەخانا کەلەپووری دێ گه‌له‌ك گرنگییا خۆ هه‌بیت.

خالد نەرمۆ، زێده‌تر بۆ ئاژانسا خانی دیار كر: ئێک ژ پرۆپوزه‌لێن نووژەنکرنا پەرستگەھا لالش ئەوه‌ كو خانا ئێزی بھێتە نووژەنکرن کو خانا ئێزی ئێکە ژ ئاڤاھیێن ھەره‌ کەڤنار ل پەرستگەھا لالش ئەڤە دێ بیتە مۆزەخانا کەلەپووری بۆ پاراستنا کەلەپوورێ ئێزدیان” ھەموو کەلەپوورێ ئۆلی یێ ئێزدیان دناڤ خانا ئێزیدا دھێتە کۆمکرن و پاراستن، جلوبەرگێن کەلەپووری و موزیک و ئەو کەرەستێن کەڤن یێن ئێزدیان بکار دئینان بۆ کارێن چاندنێ و ناڤمالێ ھەموو جۆرێن کەلەپووری دێ دناڤ مۆزەخانا کەلەپوورێ ئێزدیان دا ھێنە پاراستن و نوکە ئه‌و پرۆپوزەله‌ ھاتییە بەرھەڤکرن، ھێشتا بودجە بۆ نەھاتییە تەرخانکرن و دەست ب کارێ سەخبێری و نووژەنکرنا خانا ئێزی نەھاتییە کرن، ھەر دەمێ لایەنەک پشتەڤانییێ لێ بکەت و بودجەیی بۆ تەرخان بکەت، دێ دەست ب بجهئینانا وی پرۆژەیی ھێتە کرن”.