<h3 style="text-align: justify;"><span style="font-size: 18pt;">رێكێن 64 گوندێن سنۆرێ پارێزگه‌ها دهۆكێ دێ هێنه نووژه‌نكرن، به‌رپرسێ پشكا ته‌كنیكییا رێڤه‌به‌رییا سه‌خبێرییا رێك و پران ل دهۆكێ دیاركر، پرۆسه‌یا سه‌خبیركرنا رێكێن گوندان ده‌ستپێكرییه، و چه‌ندین پرۆژه‌یێن دى یێن نووژه‌نكرنێ بۆ سالا 2023ێ ل به‌رده‌ستێ وانن.</span></h3> <h3 style="text-align: justify;"><span style="font-size: 18pt;">ئه‌ندازیار هه‌ڤال عه‌لى به‌رپرسێ ته‌كنیكییێ رێڤه‌به‌رییا سه‌خبیركرنا رێك و پران ل پارێزگه‌ها دهۆكی بۆ ئاژانسا خانى دیاركر، وان ل هه‌یڤا چریا دووێ یا سالا 2022ێ ل سه‌ر پلانا وێ سالێ ده‌ست ب نووژه‌نكرن و چاككرنا رێكێن گوندان كر، ل دووڤ وێ پلانێ رێكێن 64 گوندان دێ هێنه نووژه‌نكرن، 13 ملیار و 232 ملیۆن و 237 هزار دینار ل سه‌ر بودجه‌یا سالا 2022ێ یا پارێزگه‌ها دهۆكێ و په‌ره‌پێدانێ هاتینه ته‌رخانكرن، كو 21 گوند یێن قه‌زا دهۆكێنه، 17 گوند یێن قه‌زا ئامێدییێ نه، شه‌ش گوند یێن قه‌زا سێمێلێنه و 20 گوند یێن قه‌زا شێخانن.</span></h3> <h3 style="text-align: justify;"><span style="font-size: 18pt;">ئاماژه ب هندێ دا، هژماره‌كا رێكان هاتینه نووژه‌نكرن، نوكه كارێ نووژه‌نكرنێ د چه‌ند رێكێن دیدا دهێته‌كرن و رێكا سێ گوندێن قه‌زا سێمێلێ ب ریژه‌یا 100%ێ تمامبوویه، ل دووڤ پێشبینییا وان ئه‌گه‌ر چ ئاریشه‌یێن دارایى و ته‌كنیكى په‌یدانه‌بن، هه‌تا وه‌رزێ زڤستانێ دێ رێكێن هه‌موو گوندان هێنه نووژه‌نكرن.</span></h3> <h3 style="text-align: justify;"><span style="font-size: 18pt;">به‌رپرسێ ته‌كنیكییێ رێڤه‌به‌رییا سه‌خبیركرنا رێك و پران ل دهۆكێ ئاشكرا ژى كر، بۆ سالا 2023ێ 17 پرۆژه‌یێن دى یێن قه‌زا دهۆكێ ل به‌ر ده‌ستێ وانن، ئه‌گه‌ر پاره بۆ هاته ته‌رخانكرن دێ بجهئینن كو نێزیكى پێنج ملیار و 600 ملیۆن دیناران دێ لێ هێنه مه‌زاختن، یێن قه‌زا ئامێدییێ 10 پرۆژه‌نه و دێ سێ ملیار و 700 ملیۆن دینار لێ هێنه مه‌زاختن، قه‌زا شێخان ژى پێنج پرۆژه‌نه و 757 ملیۆن دینار دێ لێ هێنه مه‌زاختن، قه‌زا سێمێلێ شه‌ش پرۆژه‌نه و دێ نێزیكى ئێك ملیار و 600 ملیۆن دیناران لێ هێنه مه‌زاختن و گوت : ئه‌و بۆ ده‌ستپێكرنا بجهئینانا ڤان پرۆژه‌یان د به‌رهه‌ڤن و هه‌ر ده‌مێ پاره بۆ هاته ته‌رخانكرن دێ ده‌ست بجهئینانا وان پرۆژه‌یان هێته‌كرن.</span></h3>
