سوبه‌هى قانوونا بودجه‌ى دێ چیته‌ دبوارێ بجهئینانێدا

بریاربوو ئه‌ڤرۆ شاندێ حكومه‌تا هه‌رێما كوردستانێ سه‌ره‌دانا به‌غدا بكه‌ت و دگه‌ل به‌ر‌پرسێن حكومه‌تا عیراقێ دانوستاندن ل دۆر پشكا هه‌رێما كوردستانێ و مووچه‌ى كربان، لێ كۆمبوون بۆ سوبه‌هى رۆژا دووشه‌مبى هاته‌ پاشخستن.

سیپان شێروانى ئه‌ندامێ جڤاتا نوونه‌رێن عیراقێ ژ فراكسیۆنا پارتى بۆ ئاژانسا خانى دیاركر، چ ئاریشه‌ ل به‌رامبه‌ر كۆمبوونا شاندێ حكومه‌تا هه‌رێما كوردستانێ دگه‌ل حكومه‌تا عیراقێ نینن، و پاشخستنا كۆمبوونا ئه‌ڤرۆژى ب تنێ ژبه‌ر هندێ یه‌ كو حكومه‌تا عیراقێ هێشتا رێنمایێن بجهئینانا بودجه‌ى تمامنه‌كرینه‌ و ئه‌ڤ چه‌نده‌ پێدڤى ب ده‌مییه‌.

ئاماژه‌ ب هندێ ژى دا، چ ئاریشه‌ و لێك دووركه‌ڤتن دناڤبه‌را هه‌ردوو حكومه‌تاندا نینن، قانوونا بودجه‌ى دێ چیته‌ دبوارێ بجهئینانێدا و ئه‌و به‌ندێن گرێداى هه‌رێما كوردستانێ دێ هێنه‌ ئیمزاكرن، مووچه‌ دێ د ده‌مێ خوه‌دا هێنه‌دان، ئه‌گه‌ر رێنمایێن بجهئینانا بودجه‌ى پتر گیروبوون و ژ ڤێ حه‌فتییێ ژى بوورین، ب دیتنا وان حكومه‌تا عیراقێ دێ كوژمه‌كێ پاره‌ى بۆ مووچه‌یێ فه‌رمانبه‌ران وه‌كو پێشینه‌ بۆ حكومه‌تا هه‌رێما كوردستانێ هنێریت.