پرۆژهیهكێ بهرههمئینانا سپیاتییان ب خهرجییا 60 ملیۆن دۆلاران دێ ل قهزایا سێمێلێ یا پارێزگهها دهۆكێ هێته ڤهكرن، كو دێ بیته مهزنترین پرۆژهیێ بهرههمئینانا سپیاتییان ل سهر ئاستێ ههرێما كوردستانێ و عیراقێ.
فهرمانگهها میدیا و زانیارییان یا حكومهتا ههرێما كوردستانێ ل دۆر وى پرۆژهى راگههاند، ئێك ژ پلانێن ستراتیجى یێن كابینهیا نههێ یا حكومهتا ههریما كوردستانێ گرنگیدان و پێشڤهبرنا زێدهتر یا كهرتێ چاندنێ یه، بۆ ڤێ مهرهمێ ژى ئاسانكارییێن تمام بۆ خۆدانێن پرۆژهیان هاتینه كرن، دوى چارچوڤهی ژیدا دێ پرۆژهیهكێ بهرههمئینانا سپیاتییان ل قهزا سێمێلێ یا سهر ب پارێزگهها دهۆكێ ڤه ل سهر رووبهرێ هزار دونهمان هێته دروستكرن و ل دووماهییا ئهڤ ساله دێ تمام بیت.
ل دۆر شیان و ژڤانێ تمامبوون و زانیارییێن زێدهتر ل دۆر پرۆژهى، نهقیب ئهبوبهكر رێڤهبهرێ پرۆژهی دبێژیت : تێچویێ ئهڤى پرۆژهى 60 ملیۆن دۆلارن و دوو بۆ سێ هزار چێلێن شیردهر بخۆڤهگریت، كو دشێن رۆژانه 120 تهنێن شیرى بهرههم ئینن و ماست، ئاڤا ماست، پهنیر و شیر و تامێن جۆدا ژێ هێنه بهرههمئینان.
فهرمانگهها میدیا و زانیارییان بهحس ل هندێ كر، نوكه پرۆژه 80%ێ تمامبوویه و ل دووماهییا ئهڤ ساله دێ تمام بیت و بیته مهزنترین پرۆژهیێ بهرههمئینانا سپیاتییان ل ههرێما كورستانێ و عیراقێ.
ژلایێ خۆڤه خۆدانێ پرۆژهى ئاماژه ب هندێ دا كابینهیا نههێ یا حكومهتا ههرێما كوردستانێ ژلایێ دابینكرنا زهڤى، كارهب، ئاڤ و پێدڤییێن دیڤه، ههموو ئاسانكارى بۆ بجهگههاندنا پرۆژهى كرینه.
