نێچیرڤان بارزانی، سەرۆکێ هەرێما کوردستانێ، ئەڤرۆ د سالڤەگەڕا جینۆسایدا بارزانییان پەیامەك بەلاڤكر.
دەقێ پەیاما سەرۆكێ هەرێما كوردستانێ؛
ئەڤرۆ ب ڕێز ڤە، سالڤەگەڕا چل سالییا ئەنفالكری و بێسەرۆشینكرنا 8 هزار سنێلە، گەنج، زەلام و دانعەمر یێن بارزانییان دكەین. كو ل دووماهیكا تیرمەهێ هەتا ناڤەڕاستا تەباخا 1983ێ ل كۆمەلگەهـ پترییا مالان بوونە قوربانی تاوانەكا دڕاندانە و هەوەكا ڕەش یا دەستهەلاتا وی دەمی یا عیراقێ ئێدی نەڤەگەڕیت.
ب هزاران خێزانێن بارزانی بێ دەستهەلات ل كۆمەلگەهێن قوشتەپە و بەحركێ و هەریر و سۆران و چەند جهێن دی، بێ باب و برا و ب هزاران ژنێن جانێن بارزانی، بێ زەلام ماینە و نەچار بووینە ب تنێ بەرهەنگاری چارەنڤیسەكێ نەدیارێ دژوار ببن و شیان خۆ ل بەر دەهان دەردەسەری و نەهامەتییێ بگرن و بمینن.
ئەو بۆ زارۆكێن خۆ بوونە باب، بۆ پەیداكرنا ژین و ژیار و پەروەردەیێ، ئازار و دژواری و گەلەك نەخۆشی كێشاینە، شیان خۆ ل بەر هەژاری و بێكەسییێ بگرن ب ڕەنگەكێ زەحمەت، بەرهەنگاری ژیانێ بووینە و شیاینە نفشەكێ نیشتیمانپەروەر و وەلاتپارێز پەروەردە بكەن. ئێك ب ئێك دەستێ ئەوان دەیكێن دلسۆز ماچی دكەم.
ئەنفالكریێن بارزانییان وەكی ئەو هەمی تاوانێن دەرهەقێن گەلێ كوردستانێ هاتینەكرن، نە هەر هێز و تێهنیێن گەلێ مە ژ بۆ بەرهەنگاربوونا زۆلم و دكتاتۆریێ دەست ژێ نەبەرداینە، بەلكۆ گیانێ بەرهەنگاری و ئیرادەیا سەركەڤتن و ئازادی، لایێ هەمی گەلێ كوردستانێ ب دژوارتر كریە و ب باوەرییەكا بهێز بەردەوام ب تێكۆشانێ دایە.
د ئەڤێ سالڤەگەڕێدا سلاڤ بۆ قوربانییێن ئەنفال و هەمی شەهیدێن كوردستانێ دهنێرم و سەرێ ڕێزێ ل هەمی گیانێ پاقژ دهنێرم. سلاڤ و سوپاس و پێزانین بۆ هەمی ئەو جامێرێن هەولێر و دەوربەران، ژ حەریر و باتاس و سۆران و هەر ل كیڤە بن، كو هاریكاریا خێزان و كەسوكارێن ئەنفالكریێن بارزانییان دا و پشتەڤانی لێ كری.
هەر د ئەڤێ سالڤەگەڕێدا و د دەمەكیدا هەرێما كوردستانێێ، د ڕەوشەكا هەستییاردا دەربازدبیت، دووپات ل ئێكڕێزی و تەڤاهی و پێكڤەژیانا هەمی لایان و پێكهاتەیێن كوردستانێ دكەین كو تاكە ڕێكا سەرفەرازی و سەركەڤتنا مەیە.
نێچيرڤان بارزانى
