دكۆمبوونا جڤاتا وه‌زیراندا بریاره‌ك ل دۆر مووچه‌ى و به‌نزینێ هاته‌ دان

دكۆمبوونا جڤاتا وه‌زیرێن هه‌رێما كوردستانێدا گوتوبێژا چه‌ند بابه‌تێن گرێداى ژیانا وه‌لاتییان هاته‌ كرن و بریار ل سه‌ر بابه‌تێن مووچه‌ى، به‌نزینێ و كاره‌بێ هاته‌ دان.

دبرگه‌یا ئێكێ یا كۆمبوونێدا، سه‌رۆكوه‌زیران تیشك خسته‌ سه‌ر دووماهى پێشهاتێن بجهئینانا قانوونا بودجه‌یا عیراقێ و دابینكرنا شایسته‌یێن دارایى و مووچه‌ى و پشكا هه‌رێما كوردستانێ و رێره‌وێ دانوستاندنان دناڤبه‌را حكومه‌تا هه‌رێمێ و به‌غدا دا.

سه‌رۆكێ حكومه‌تێ ئاماژه‌ ب هندێ دا كو هه‌رێما كوردستانێ هه‌موو پابه‌ندییێن خوه‌ بجهئیناینه‌ و ب ڤى شێوه‌یى چ بهانه‌ ل به‌رده‌م حكومه‌تا فیدرال نه‌ماینه‌ كو خه‌رجكرنا شایسته‌یێن دارایى یێن هه‌رێما كوردستانێ زێده‌تر گیرۆبكه‌ت، پێدڤییه‌ حكومه‌تا فیدرال ماف و شایسته‌یێن دراراییێن هه‌رێما كوردستانێ ل دووڤ قانوونا بودجه‌ى ب هنێریت.

برگه‌یا دووێ ژ كۆمبوونێ یا تایبه‌ت بوو ب ره‌وشا كاره‌بێ و گرانییا به‌نزینێ ل هه‌رێما كوردستانێ و بزاڤێن وه‌زاره‌تا كاره‌بێ و وه‌زاره‌تا سامانێن سروشتى دڤى بیاڤیدا، كو ژلایێ كه‌مال محه‌مه‌د سالح وه‌زیرێ كاره‌بێ و وه‌زیرێ سامانێن سروشتى ب وه‌كاله‌ت هاتنه‌ دیاركرن، ئاماژه‌ ب بزاڤێن وه‌زاره‌تا سامانێن سروشتى بۆ چاره‌سه‌ركرنا ئاریشه‌یا گرانبوونا بهایێ به‌نزینێ و ئاسانكارییێن وه‌زاره‌تێ بۆ هاورده‌كرنا به‌نزینێ و هاندانا پالاوگه‌هان بۆ پالاوتنا زێده‌تر یا نه‌فتا خاف بۆ دابینكرنا به‌نزینێ دا.

سه‌باره‌ت كاره‌بێ ژى، وه‌زیرێ كاره‌بێ ئاماژه‌ ب بزاڤێن وه‌زاره‌تێ بۆ باشتركرنا ره‌وشا خزمه‌تگوزارییا كاره‌بێ و بزاڤكرن بۆ زێده‌كرنا ده‌مژمێرێن كاره‌با نیشتیمانى و ئه‌و پرۆژه‌یێن ل ده‌مێن بووری بۆ ڤى ئاراسته‌یى هاتینه‌ بجهئینان كر.

جڤاتا وه‌زیران زێده‌بارى هه‌لسه‌نگاندنا بزاڤ و پرۆژه‌یێن هه‌ردوو وه‌زاره‌تان، وه‌زیر راسپاردن كو ل سه‌ر رێكار و بزاڤێن خوه‌  بۆ دابینكرنا كاره‌بێ و سوته‌مه‌نییێ بۆ وه‌لاتییان دبه‌رده‌وامبن و هه‌موو ئاسانكارییان دڤى بیاڤیدا بكه‌ن.