سەرۆك مەسعود بارزانی، ئەڤرۆ ب هەلكەڤتا دەربازبوونا نەهـ سالان ب سەر جینۆسایدا شنگالێ پەیامەك بەلاڤكر.
دەقێ پەیاما سەرۆك مەسعود بارزانی؛
ب ناڤێ خودێ مەزن و دلوڤان
پشتی دەربازبوونا نەهـ سالان ب سەر كارەساتا شنگالێ ب لێبورینڤە برینێن شنگالێ نەهاتینە ساخكرن و ئازار و نەهامەت و ئاوارەییا خویشك و براییێن ئێزدی بەردەوامە، ڕێككەڤتنا دناڤبەرا حكومەتا هەرێما كوردستان و حكومەتا عیراقێ بۆ ئاساییكرنا ڕەوشا شنگالێ و ڤەگەڕاندنا ئاوارەیان باشترین چارەسەرییە بۆ ب دووماهیك ئینانا نەهامەتی و ئازارێن وەلاتییێن شنگالێ.
بەلێ جهێ پرسیارێ یە بوچی هەتا نوكە حكومەتا عیراقێ نەشیاینە ڕێككەڤتنا ئاساییكرنا ڕەوشا شنگالێ ب جهبینن و هەتا كەنگی حكومەتا عیراقێ دێ ڕێكێ ب ئەوان هێز و لایەنان دەت یێن كو ڕێگرییێ ب جهئینانا ڕێككەڤتنا شنگالێ دكەن؟
د ئەڤێ بیرەوەرییێدا گەلێ كوردستانێ چاڤەرێ جڤاكێن نیڤدەولەتی و وەلاتێن دی هەیە، هەروەك ئەلمانیا و بریتانیا ب فەرمی دان ب جینۆسایدا ئێزدییان ژ لایێ داعشێ ڤە بكەن و هەروەسا ب فەرمی كیمیابارانكرنا پرۆسەیا ئەنفال و هەمی تاوانێن دی ب جینۆساید ب نیاسن ئەوێن كو بەرامبەر گەلێ كوردستانێ هاتینە ئەنجامدان.
د سالڤەگەڕا نەهێ یا كارەساتا شنگالێدا سلاڤا بۆ گیانێ شەهیدان و قوربانییێن ئەڤێ تاوانێ د هنێرین، ڕۆلێ هێزێن پێشمەرگەیێ كوردستانێ بلند د نرخینین كو دیرۆك و قاهرەمانی بۆ ئازادكرنا چیایێ شنگالێ تۆماركریە، هەروەسا شنگالێ خوینا خۆ دایە و تۆلا خۆ ژ تیرۆرستێن داعش ڤەكریە.
مەسعود بارزانی
