مەسرور بارزانی، سەرۆکێ حکومەتا هەرێما کوردستانێ ئەڤرۆ د سالڤەگەڕا جێنۆسایدا ئێزدییان و د کۆمەلکۆژییا شنگالێدا پەیامەك بەلاڤكر.
دەقێ پەیاما سەرۆكێ حكومەتا هەرێما كوردستانێ؛
نەهـ سالان بەری نوكە، تیرۆرستێن داعش هێرشەكا دڕندانە ئینا سەر شنگالێ و دەوروبەرێن وێ و بوو ئەگەر ب هزاران كەس ژ ئاكنجییێن ئەڤێ دەڤەرێ كومەلكۆژ و بێسەروشوین و ئاوارەبن.
د ئەڤێ ڕۆژا نەخۆشدا، ب ڕێز بیرەوەرییا هەمی قوربانییێن ئەوێ كومەلكۆژییێ دكەین، هەروەسا ب پێزانین ڤە سالڤەگەڕا خۆڕاگری و قارەمانی و قوربانیدانا هێزێن پێشمەرگەیێ كوردستانێ ب ڕێبەرایەتییا سەرۆك مەسعود بارزانی دكەین، كو ئەفسانەیا چەكدارێن تیرۆرستێن داعش تێكشكاند و شنگال ڕزگاركر و داستانەكا دیرۆكی تۆماركر.
دەستخۆشییێ ل هەمی ئەوان وەلاتان دكەین كو تاوانێن تیرۆرستێن داعش ل دژی كوردێن ئێزدی ب فەرمی ب جینۆساید ناساندی، هیڤیدارین جڤاكێن نیڤدەولەتی د هاریكاربن بۆ كێمكرنا ئێش و ئازارێن خویشك و برایێن مە یێن ئێزدی.
ب لێبورینڤە پشتی دەربازبوونا نەهـ سالان ب سەر ئەڤێ كارەساتێ، هێشتا ڕەوشا دەڤەرا شنگالێ ئاسایی نەبوویە و ژ ئەگەرێ خۆسەپاندنا میلیشیا و گرۆپێن چەكدارێن نەیاسایی، خویشك و برایێن مە یێن ئێزدی نەشیاینە ڤەگەڕنە جهێن خۆ و دەڤەر نەهاتینە ئاڤەدانكرن.
د ئەڤێ ڕۆژێدا، پشتەڤانییا خۆ بۆ داخوازییێن خوشك و برایێن مە یێن ئێزدی دووپات دكەین و پێدڤییە دووماهیك ب ڕەوشا نەیائاسایی یا شنگالێ ب ئینین.
هەروەسا دووپات ل ب جهئینانا ڕێككەڤنامەیا شنگالێ و دەرچوونا ئەو هێزێن نەیاسایی ل دەڤەرێ دكەین، بۆ هندێ ب هاریكارییا حكومەتا فیدرال و جڤاكێن نیڤدەولەتی، ئەو دەڤەر بهێنە ئاڤەدانكرن و دەستهەلاتا دەڤەرێ ڤەگەڕیتە دەستێ وەلاتییێن ڕەسەنێن شنگالێ.
سەرێ ڕێزێ بۆ شەهیدیێن كومەلكۆژییا شنگالێ و هەمی شەهیدێن كوردستانێ د چەمینین.
مەسرور بارزانی
سەرۆکێ حکومەتا هەرێما کوردستانێ
