حكومه‌تا هه‌رێما كوردستانێ راگه‌هاند، دێ ب رێكا فۆرما ئۆنلاین 9 هزار شوقه ب سه‌ر كه‌سێن كرێچى و كێمده‌رامه‌تدا هێنه به‌لاڤكرن، په‌یڤدارێ وه‌زاره‌تا ئاڤه‌دانكرنێ ژى روونكرنه‌كێ ل دۆر ڤێ چه‌ندێ دده‌ت.
ل دووڤ راگه‌هاندنه‌كێ، سوبه‌هى رۆژا سێشه‌مبى 8-8-2023ێ دانا عه‌بدولكه‌ریم وه‌زیرێ ئاڤه‌دانكرن و ئاكنجیبوونێ، دێ د رێوره‌سمه‌كیدا به‌لاڤكرنا فۆرمێن یه‌كه‌یێن ئاكنجیبوونێ و كاراكرنا فۆرمێ ب شێوه‌یێ ئۆنلاین بۆ كه‌سێن كێمده‌رامه‌ت راگه‌هینیت.
مه‌ریوان حه‌سه‌ن په‌یڤدارێ وه‌زاره‌تا ئاڤه‌دانكرن و ئاكنجیبوونێ دیاركر، سوبه‌هى هووركارییێن تمام دێ هێنه راگه‌هاندن، كه‌سێن كێمده‌رامه‌ت دشێن ب رێكا ئۆنلاین فۆرما شوقه‌یێن ئاكنجیبوونێ پر بكه‌ن.
ئاماژه ب هندێ ژى دا، 9 هزار شوقه‌یێن ئاكنجیبوونێ ل سۆران، سلێمانى و قه‌زا و ناحییان هه‌نه، ئه‌و شوقه‌یێن دێ هێنه به‌لاڤكرن، دێ ب چه‌ند مه‌رجان ب سه‌ر كه‌سێن كێمده‌رامه‌ت و هه‌ژاردا هێنه به‌لاڤكرن.
