ئاژانسا خانی:
ئه‌ڤرۆ شه‌مبییێ” هه‌ردو وەزیرێن دارایی و ناڤخۆ یێن عیراقێ دێ بۆ كۆمبوونا پەرلەمانێ عیراقێ هێنه گازیكرن، دو پرسیار ده‌ربارەیی “گوهۆڕینا سیستەمێ وەزارەتا دارایی” و “رێکارێن دەركه‌فتنا پاسپۆرت و ناسناما وه‌لاتییان ” دێ هێنه ئاراستە کرن.
شێروان دوبەردانی، ئەندامێ فراکسیۆنی پارتی دیموکراتی کوردستان ل پەرلەمانێ عێراقێ گۆت، ئەڤرۆ پەرلەمانێ عێراقێ دێ كۆم بیت و تەیف سامی، وەزیرا دارایی و عەبدولئەمیر شەمەری، وەزیرێ ناڤخۆیی یێ عیراقێ بۆ وێ كۆمبوونی هاتینه داخواز كرن و دانوستاندن دناڤبه‌را وان وه‌زیران و ئه‌ندامێن په‌رله‌مانێ عیراقێ دێ هێته كرن.
ئه‌و ژی گۆت: د وێ روونشتنا په‌رله‌مانێ عیراقێ دا” دو پرسیار دێ ژ وەزیرا دارایی و وه‌زیرێ ناڤخۆیێ عێراقێ هێته کرن” ئه‌و پرسیار ژی دێ ل سه‌ر “رێکارێن ڤه‌گوهاستنا سیستەمێ وەزارەتا دارایی ژ دیجیتالی بۆ ‘ئەتمەتە’ دناڤبه‌را وەزارەتا دارایی، بانكان و سازی یێن حکومەتا فیدرالی” ئاراستەیی وەزیرا دارایی هێنه كرن” هه‌روه‌سا پرسیارا ” گیروبوونا دەرخستنا پاسپۆرتێ و ناسنامێن وه‌لاتییان ب شێوەكێ گشتی ل عێراقێ و هەرێما کوردستانێ ژ لایێ وەزارەتا ناڤخۆ ڤە” دێ ئاراستەیی عەبدولئەمیر شەمەری، وەزیرێ ناڤخۆیێ عیراقێ هێته كرن و پشتی ئه‌و كۆمبوونا په‌رله‌مانێ ب دووماهی دهێت، ژ دەرڤه‌یی هۆلا پەرلەمانی” په‌رله‌مانتارێن كورد دشێن وەزیرا دارایی مێهڤان بکەن و پرسیارا گیروبوونا مووچه‌یێ فه‌رمانبه‌رێن هه‌رێمێ ئاراستە بکەن”.
