ئه‌ندامه‌كێ لژنا نەفت و غازێ ل پەرلەمانێ عێراقێ دیار كر: پێدڤییە ڕەشنڤیسێ یاسایا نەفت و غاز ب هەماهەنگی دناڤبهرا حکومەتا هەرێمێ و عێراقێ دا بهێته نڤێسین، ل ڤان رۆژان دێ دانوستاندن پتر دناڤبهرا هه‌رێمێ و عیراقێ دا هێنه كرن.
د. سەباح سوبحی، زێده‌تر گۆت: نوكه دانوستاندن ل سەر پڕۆژە یاسایا نەفت و غازێ ل وەزارەتا نەفتا عێراقێ د بەردەوامن و ئێک ژ تەوەرێن گرنگ یێن كو شاندێ پارتی ل به‌غدا به‌حس كری یاسایا نەفت و غازێ بوو، ڤێ حه‌فتییێ دێ پتر دانوستاندن هێنه كرن، ژ پێخه‌مه‌ت رێککەفتنا سیاسی بهێته كرن، چونکی ئەو یاسایە گه‌له‌ك یێ هەستیارە و دێ چارەنڤیسێ هەرێمێ و ئەو پارێزگه‌هێن نەفت لێ دهێته بەرهەمئینان دیار كه‌ت” له‌وما ئەو یاسایە بۆ هەرێما کوردستانێ گه‌له‌ك یێ گرنگە.
ناڤهاتی گۆت ژی: پێدڤییە مافێن خۆ لدووڤ دەستووری و مافێن خۆ یێن دەستووری د مادێن 111 و 112 دناڤا وی یاسایی دا بنه‌جهـ بكه‌ین ، د نوكه دا ئه‌و یاسایه ل وەزارەتا نەفتا عێراقێیە، مه ژی پێداگیری ل سه‌ر هندێ كرییه كو دڤێت ئه‌و ره‌شنڤیسه ب هەماهەنگییا هه‌رێمێ و به‌غدا بهێته ئامادە كرن، هه‌روه‌سا دڤێت لدووڤ ل هه‌ڤهاتنێ و شەراکەتێ و هه‌ڤسەنگییێ کار بهێته کرن و ئه‌م هه‌موو بزاڤان دكه‌ین كو مافێن هەرێما کوردستانێ د وێ یاسایێ دا بهێنه پاراستن.
