سێ پرۆژه‌یێن ستراتیجى دێ ل به‌رده‌ره‌شێ هێنه‌ بجهئینان

به‌رپرسێ راگه‌هاندنا قائیممقامییا قه‌زا به‌رده‌ره‌ش راگه‌هاند، مه‌سرور بارزانى سه‌رۆكێ حكومه‌تا هه‌رێما كوردستانێ ره‌زامه‌ندى ل سه‌ر بجهئینانا سێ پرۆژه‌یێن ستراتیجى ل قه‌زا به‌رده‌رش دایه‌، و زێده‌تر ژ 100 ملیار دیناران بۆ بجهئینانا وان پرۆژه‌یان هاتینه‌ ته‌رخانكرن.

بۆتان شه‌مسه‌دین به‌رپرسێ راگه‌هاندنا قائیممقامییا قه‌زا به‌رده‌ره‌ش بۆ ئاژانسا خانى دیاركر، سێ پرۆژه‌یێن ستراتیجى ب كوژمێ 101 ملیار دیناران ل سنۆرێ قه‌زا به‌رده‌ره‌ش دێ هێنه‌ بجهئینان، ئه‌وژى پرۆژه‌یێ دروستكرنا جووت سایدێ ( ئامیان – به‌رده‌ره‌ش – كه‌له‌ك )، ( دروستكرنا ئوڤه‌رپاسا چواریانا ئامیان ) و دروستكرنا سایدێ كه‌ڤن یێ ( رۆڤیا – به‌رده‌ره‌ش ).

ئاماژه‌ ب هندێ ژى دا قائیممقامێ قه‌زا به‌رده‌ره‌ش و د. عه‌لى ته‌ته‌ر پارێزگارێ دهۆكێ بزاڤێن به‌رده‌وام بۆ بجهئینانا ئه‌ڤان پرۆژه‌یان دكرن، نوكه‌ ئه‌و پرۆژه‌ ل رێڤه‌به‌رییا رێك و پران ل پارێزگه‌ها دهۆكێ نه‌، د ده‌مه‌كێ نێزیكدا كارێن وان دێ تمام بن و ره‌وانه‌ وه‌زاره‌تا ئاڤه‌دانكرن و ئاكنجیكرنێ هێنه‌كرن، دووڤدا دێ ده‌ست بجهئینانا وان هێته‌كرن.