سه‌رۆككۆمار داخوازێ ژ په‌رله‌مانێ عیراقێ دكه‌ت بابه‌تێ پارێزگه‌هبوونا هه‌له‌بجه‌ بێخیته‌ دناڤ كارنامه‌یا روونشتناندا

سه‌رۆككۆمارێ عیراقێ دخوازیت پرۆژه‌قانوونا ب پارێزگه‌هبوونا هه‌له‌بجه‌ بچیته‌ دناڤا كارنامه‌یا روونشتنێن په‌رله‌مانیدا.

سه‌رۆكایه‌تییا كۆمارییا عیراقێ دراگه‌هاندنه‌كێدا دیاركر، له‌تیف ره‌شید سه‌رۆككۆمارێ عیراقێ داخوازا ژ سه‌رۆكێ په‌رله‌مانێ عیراقێ كر، رێكارێن پارێزگه‌هبوونا هه‌له‌بجه‌ ژ قه‌زایێ بۆ پارێزگه‌هێ ژ چارچووڤێ وى پرۆژه‌قانوونا ژلایێ حكومه‌تێڤه‌ هاتییه‌ ره‌وانه‌كرن، كار ل سه‌ر بهێته‌كرن و بكه‌ڤنه‌ د كارنامه‌یا روونشتنا په‌رله‌مانیدا.

سه‌رۆككۆمارێ عیراقێ ئاماژه‌ ب هندێ دا، هه‌له‌بجه‌ سمبۆلا قوربانیدانێ یه‌ دژى سته‌م و رژێما پێشتر و خه‌لكێ وێ رووبروو كۆمه‌لكۆژییێ بوو، له‌وما پێدڤییه‌ پرۆژه‌قانوونا پارێزگه‌هبوونا باژێرى بكه‌ڤیته‌ ناڤا كارنامه‌یا روونشتنێن په‌رله‌مانى و بزاڤ بۆ په‌سه‌ندكرنا وێ بهێنه‌كرن، داكو ل رۆژنامه‌یا فه‌رمییا وه‌لاتى بهێته‌ به‌لاڤكرن و پشتى رێكارێن قانوونى، وه‌زاره‌تا پلاندانانێ رێكارێن تایبه‌ت ب گوهۆرینا وێ ژ قه‌زایێ بۆ پارێزگه‌هێ بجهبینیت.