سه‌رۆكێ هه‌رێما كوردستانێ ل گه‌ل شانده‌كێ بلند یێ هه‌ڤپه‌یمانیا نێڤده‌وله‌تى كۆم بوو و تێدا چاكسازیێن د وه‌زاره‌تا پێشمه‌رگه‌ى دا و ژماره‌یه‌كا ته‌وه‌رێن دى هاتنه به‌حسكرن.
نێچیرڤان بارزانى سه‌رۆكێ هه‌رێمێ و فه‌رمانده‌یێ گشتى یێ هێزێن پێشمه‌رگه‌ى G ئێڤاریا ئه‌ڤرۆ پێشوازى ل شانده‌كێ بلند یێ هێزێن هه‌ڤپه‌یمانان كر كو ژ جه‌نه‌رال ماتیۆ ماكفارلان فه‌رمانده‌یێ به‌رێ یێ هێزێن هه‌ڤپه‌یمانان ل ئیراقێ و سووریا و جه‌نه‌رال جوول ڤاول فه‌رمانده‌یێ نوى یێ هێزێن هه‌ڤپه‌یمانان ل ئیراقێ و سووریا و كۆنسۆلێ گشتى یێ نوى یێ ئه‌مریكا ل هه‌رێما كوردستانێ و ژماره‌یه‌كا به‌رپرسێن سه‌ربازى و دپلۆماسى پێكهاتبوو.
سه‌رۆكاتیا هه‌رێمێ ئاماژه ب وێ یه‌كێ كریه؛ د دیداره‌كێ دا، نێچیرڤان بارزانى سوپاسیێن هه‌رێما كوردستانێ گه‌هاندنه جه‌نه‌رال ماكفارلان فه‌رمانده‌یێ به‌رێ یێ هێزێن هه‌ڤپه‌یمانان ل ئیراقێ و سووریا ژ به‌ر رۆل و پشته‌ڤانیا وان بۆ ئیراقێ و هه‌رێما كوردستانێ بۆ به‌رهنگاریا تیرۆرێ و تێكشكاندنا داعش.
ل گۆره‌ى راگه‌هاندنا سه‌رۆكاتیێ.“سه‌رۆكێ هه‌رێما كوردستانێ هیڤیا سه‌ركه‌فتنێ بۆ ماكفارلان د ئه‌ركێ وى یێ نوى دا خواست و بخێرهاتنا جه‌نه‌رال ڤاول فه‌رمانده‌یێ نوى یێ هێزێن هه‌ڤپه‌یمانان ل ئیراقێ و سووریا كر هه‌روه‌سا به‌رهه‌ڤیا هه‌رێما كوردستانێ بۆ به‌رده‌وامیا هاریكاریا هه‌ڤپشك و سه‌رخستنا ئه‌ركێ هه‌ڤپه‌یمانیا نێڤده‌وله‌تى بۆ ژناڤبرنا ب ئێكجارى یا داعش ده‌ربڕى”،
راگه‌هاندنێ دیار ژى كریه “د دیداره‌كێ دا، دویماهیك پێشهات و گاڤێن پرۆسێسا چاكسازیێ د وه‌زاره‌تا پێشمه‌رگه‌ى دا و ئێكخستنا پێشمه‌رگه‌ى هاتنه به‌حسكرن و هه‌ردو لایان نیگه‌رانیا خۆ ل دۆر گرفت و ئاسته‌نگێن د رێكا ڤێ چه‌ندێ دا ده‌ربڕین“.
