دادگەها فیدڕالی بڕیارەکا دی ل دژی بەڕژەوەندییێن کوردان ل کەرکووکێ دەرخست

دادگەها فیدڕالی یا عیراقێ بڕیارەکا دی ل دژی بەڕژەوەندییێن کوردان ل کەرکووکێ و دەڤەرێن دەرڤەی ئیدارەیا هەرێما کوردستانێ دەرکر.

 ئەڤرۆ رۆژا دووشەمبی 28 تەباخا 2023، دادگەها فیدڕالی یا عیراقێ بڕیارا نە دەستووریبوونا ژمارەیەکا ماددە و بڕگەیێن یاسایا ژمارە 4 یا سالا 2023، یا تایبەت ب هەلبژارتنێن عیراقێ دەرخست و د خالا شەشێ دا، بڕگا دووێ یا ماددەیێ 37 ب نە دەستووری دانا کو تایبەت بوو ب سزادانا ئەوان کەسان یێن رێگیریێ ل ڤەکرنا بارەگا یان چالاکییێن لایەنێن سیاسی یێن ڕێک پێدای دکەن.

ئێک ژ ئەوان ماددەیێن دادگەها فیدڕالی بڕیارا نە دەستووری بووونێ لسەر دایی، ماددەیێ 14ێ یێ یاسایێ کو بڕگا دووێ یا ماددا 37ێ یا یاسایا ژمارە 12 یا کو ل  سالا 2018 هاتیە ڕاستڤەکرن، کو دوپات دکەت “هەر کەس و لایەنەکێ ڕێگریێ ل حزبێن سیاسی بکەت بۆ ڤەکرنا بارەگایێن خۆ و ڕێکێ نە دەت حزب مومارەسەیا چالاکییێن هەلبژارتنان بکەن، دێ ب سزایێ زیندینکرنێ ب کێماتی بۆ دەمێ سالەکێ هێتە سزادان.”