د. نه‌هله‌ قادر: بۆ لێپرسینێ دێ وەزیرا داراییا عێراقێ گازی كه‌ینه‌ پەرلەمانی

ئاژانسا خانی:

پەرلەمانتاره‌كا پارتی ل پەرلەمانێ عێراقێ دبێژیت” پشتی پەسەند کرنا پرۆژه‌ یاسایا گشتی یا بوودجەیێ عیراقێ بۆ سالێن ( 2023 و 2024 و 2025 ) ێ ل هه‌یڤا شه‌ش یا ئه‌ڤ ساله‌” كو هه‌موو لایه‌نێن سیاسی ده‌نگ ل سه‌ر دایه‌” حكومه‌تا ھەرێمێ پابەند بوویە ب رێکارێن بجهئینانا وی یاسایی” ده‌رباره‌یی هنارتنا نه‌فتێ ب رێیا كۆمپانییا سۆمۆ” به‌لێ حكومه‌تا عیراقێ به‌هانه‌یان دگریت و شایستێن دارایی یێن هه‌رێما كوردستانێ ڤرێناكه‌ت، له‌وما ئه‌م ژی وه‌كو په‌رله‌مانتارێن پارتی پشتی دەستپێکرنا کۆمبوونێن پەرلەمانی دێ رێکارێن پەرلەمانی بەرامبەر حکومەتێ و وەزارەتا داراییا عێراقی گرینەبەر” ژ پێخه‌مه‌ت هنارتنا مووچه‌یێ فه‌رمانبه‌رێن هه‌رێمێ.

د. نەھلە قادر، زێده‌تر بۆ ئاژانسا خانی دیار كر: پشتی پەسەندکرنا یاسایا بوودجەیی ل هه‌یڤا شه‌شه یا ئه‌ڤ ساله‌، پێدڤی بوو” حكومه‌تا عیراقێ مووچه‌یێ فه‌رمانبه‌رێن هه‌رێمێ ڤرێكربا” به‌لێ ئه‌ڤه‌ دو هه‌یڤه‌ مووچه‌ نه‌ڤرێكرییه‌” هه‌ر چه‌نده‌ حکومەتا ھەرێما کوردستانێ ھەموو رێکار گرتینه‌ بەر بۆ بجهئینانا یاسایێ بوودجەیی و نه‌فتی راده‌ست كرییه‌” به‌لێ وەزارەتا داراییا عێراقێ پابەند نه‌بوویه‌ ب هنارتنا شایستەیێن دارایی یێن هه‌رێما كوردستانێ، ئه‌م ژی وه‌كو پارتی بێدەنگ نابین ل سەر ڤی بابەتی و پشتیی ب دووماهی هاتنا بێهنڤه‌دانا پەرلەمانی و دەستپێکرنا کۆمبوونان دێ وەزیرا داراییا عێراقێ گازی‌ كه‌ینه‌ پەرلەمانی داكو لێپرسینێ ل گه‌ل دا بكه‌ین.

ناڤهاتییێ گۆت ژی: به‌رپرسا ئێكێ یا نه‌هنارتنا مووچه‌یێ هه‌رێمێ وه‌زیرا داراییا عێراقێ یه‌” هه‌ر چه‌نده‌ محه‌مه‌د شیاع سوودانی” سه‌رۆك وه‌زیرێن عیراقێ” نیه‌ته‌كا باش نیشاندایه‌” به‌لێ یا مه‌ دڤێت ئه‌وه‌” مووچه‌یێ هه‌رێما كوردستانێ بهێته‌ هنارتن” ب كریار ب سه‌لمینن كو ئه‌و دێ مووچه‌یی هه‌موو هه‌یڤان هنێرن”