ئاژانسا خانی:
پشتى پتر ژ ساله‌كێ” گوتۆبێژ ل سه‌ر سکالایەکێ ل دادگەها بلندا فیدرالییا عێراقێ دا هاتییه كرن، ئەنجامێ وێ د بەرژەوەندییا هەرێما کوردستانێ هاته ئێكلا كرن، کو تایبەت بوو ب رادەستکرنا پارێ ئاهێن خوارنێ یێن 18 سالێن وه‌لاتییان بۆ بەغدا” ئه‌و سکالایه ژ لایێ رێڤەبەرییا کۆمپانییا گشتی یا بازرگانییا خوارنێ ل حکومەتا فیدرالییا عێراقێ ل دژى وەزیرێ بازرگانیێ هەرێما کوردستانێ هاتبوو تۆمار کرن بۆ ڤه‌گەڕاندنا پارێ نێزیکى 18 سالێن ئاهێن خوارنێ یێن هه‌یڤانه یێن وه‌لاتی یێن هەرێمى کوردستانێ.
نەوزاد کامل، رێڤەبەرێ گشتییێ بازرگانی ل وەزارەتا بازرگانی و پیشەسازییا هەرێما کوردستانێ” بۆ ئاژانسا خانی دیار كر: دادگەها بلندا فیرالییا عێراقێ ئەو سکاڵایە رەتکرییە یاكو ل دژی وان هاتییه تۆمار کرن بۆ رادەستکرنا پارێ ئاهێن خوارنێ یێن 18 سالا یێن وه‌لاتییێن هەرێما کوردستانێ بۆ بەغدا، دناڤبه‌را سالێن 2004 بۆ 2021 ێ.
ناڤهاتی گۆت ژی: مه به‌لگه‌یێن خۆ پێشکێشکرن و مه بۆ وان سه‌لماند كو وەزارەتا بازرگانییا عێراقێ ل سالا 2004 ێ هه‌تا نوكه” پاره بۆ بەلێندەرێن ڤه‌گوهاستنا ئاهێن خوارنێ یێن هه‌یڤانه ل هەرێما کوردستانێ نە هنارتینە” له‌وما ئه‌و سکالایە هاته رەتکرن.
