فوئاد حسێن و عه‌بدوللاهیانى ل نیویۆركێ په‌یوه‌ندییێن به‌غدا و ته‌هرانێ گوتوبێژكرن

وه‌زیرێ ده‌رڤه‌ یێ عیراقێ ل نیویۆركێ دگه‌ل وه‌زیرێ ده‌رڤه‌ یێ ئیرانێ گوتوبێژا ره‌وشا سیاسییا ده‌ڤه‌رێ و بجهئینانا رێككه‌ڤتنا ئه‌منى دناڤبه‌را به‌غدا و ته‌هراندا كر.

فوئاد حسێن وه‌زیرێ ده‌رڤه‌ یێ عیراقێ دپه‌راوێزا پشكداریكرنێدا ل كۆمبوونێن 78مین كۆمه‌له‌یا گشتییا نه‌ته‌وه‌یێن ئێكگرتی كو ل باژێرێ نیویۆرك دهێنه‌ ب رێڤه‌برن، دگه‌ل حسێن ئه‌میر عه‌بدوللاهیان وه‌زیرێ ده‌رڤه‌ یێ ئیرانێ كۆمبوو و هه‌ردوو لایان گوتوبێژا ره‌وشا سیاسییا ده‌ڤه‌رێ و بجهئینانا رێككه‌ڤتنا ئه‌منییا دناڤبه‌را به‌غدا ته‌هراندا و چه‌ند بابه‌تێن په‌یوه‌ندیدار كر.

ژلایێ خۆڤه‌ عه‌بدوللاهیانى سه‌ره‌دانا جێگرێ سه‌رۆكوه‌زیرێن ده‌رڤه‌ بۆ ته‌هرانێ ل حه‌فتییا بوورى بلند نرخاند، ب تایبه‌تى كو بجهئینانا رێككه‌ڤتنا ئه‌منییا هه‌ردوو لایان لێ كه‌ڤتییه‌ و حكومه‌تا عیراقێ ب هه‌ڤپشكى دگه‌ل حكومه‌تا هه‌رێما كوردستانێ رێكارێن پێدڤى ل دۆر وى بابه‌تى گرتینه‌ به‌ر.

د پشكه‌كا دییا دیدارێدا به‌حسا دووماهى پێشهاتێن په‌یوه‌ندییێن دناڤبه‌را ئه‌مریكا و ئیرانێدا و ئازادكرنا پێنج وه‌لاتییێن ئه‌مریكى به‌رامبه‌ر ئازادكرنا پاره‌یێ بلۆككرییێ ئیرانێ هاته‌ كرن، كو شه‌ش ملیار دۆلاربوون و ژلایێ كوریا باكوور ڤه‌ هاتبوونه‌ هه‌لگرتن.