ئاژانسا خانی:
بەرپرسێ لقا 20 یا پارتی دیموکراتی کوردستان” ل شێخان گۆت: د هه‌موو بیاڤان دا حکومەتا هەرێما كوردستانێ خزمەته‌كا باش بۆ قەزا شێخان کرییە، بەلێ حکومەتا عێراقێ وەکو پێدڤی خزمەتا قه‌زا شێخان نه‌كرییه، مه ژی ب رێیا راپۆرته‌كێ هه‌موو داخوازییێن خه‌لكێ شێخان گەهاندینە حکومەتا هەرێما كوردستانێ و دیسان ب ره‌نگه‌كێ باش مه به‌رهه‌ڤی بۆ هه‌لبژارتنێن جڤاتێن پارێزگه‌هێن عیراقێ ژی كرینه.
سالح حەیدەر، زێده‌تر بۆ ئاژانسا خانی دیار كر: کابینا نه‌هێ یا حکومەتا هەرێما کوردستانێ خزمەته‌كا باش بۆ خه‌لكێ قه‌زا شێخان ب ره‌نگه‌كێ گشتی و ناحییێن سه‌ر ب وێ قه‌زایێ ڤه كرینه و رێكێن هه‌موو گوندان ژی هاتینه چێكرن، دیسان خزمه‌تێن باش بۆ ناحییێن كه‌له‌كچی قەسرۆکێ و باعه‌درێ کرینه، هه‌روه‌سا سەنتەرێ قەزا شێخان پێدڤی ب خزمەته‌كا زێده‌تر هەیە، هه‌ر چه‌نده پشكه‌كا قه‌زا شێخان سەر ب ئیدارا نه‌ینه‌وا ڤه‌یە و پشكه‌كا دیتر ژی سەر ب هەرێما کوردستانێ ڤه‌یە، نوكه قه‌زا شێخان دو باژێرڤانی و دو فه‌رمانگه‌هێن چاندنێ و تاپۆیێ هه‌نه.
ناڤهاتی گۆت ژی: پشتی ئه‌م هاتینه شێخان” مه چه‌ندین روونشتن ل گەل سه‌رۆك بارزانی و سەرۆکێ حکومەتێ و ل گەل پارێزگارێ دهۆكێ و مەکتەبا ڕێکخستنا پارتی ل دهۆکێ ئه‌نجامداینه، هه‌روه‌سا مه ب هەماهەنگی ل گەل ئیدارا قەزا شێخان و لیژنێن ده‌ڤه‌را مه” مه راپۆرته‌كا هه‌ڤپشك چێكرییه و مه دایه پارێزگارێ دهۆكێ و مەکتەبا رێکخستنا پارتی ل دهۆكێ و مه بۆ جڤاتا وەزیران ژی هنارتییه و نوكه کار یێ ل سه‌ر دهێته کرن، ژ پێخه‌مه‌ت داخوازییێن خه‌لكێ شیخان بهێنه بجهئینان.
سالح حەیدەری گۆت ژی: بریارە بودجەک بكه‌ڤیته بەردەستێ قایمقامێ قه‌زا شێخان بۆ هندێ پتر خزمەتا خه‌لكێ شێخان بهێته کرن و کاره‌كێ باش ژی هاتییه کرن، به‌لێ سەنتەرێ قه‌زایێ پێدڤی ب خزمه‌تێن باشتر هه‌یه و مه دڤێت پتر خزمه‌تا خه‌لكێ خۆ بكه‌ین، چونكی پارێزگه‌ها نه‌ینه‌وا وه‌كو پیدڤێ خزمەتا قه‌زا شێخان ناكه‌ت” کو نوكه 98 هزار کەس ل سنورێ شێخان سەر ب نه‌ینه‌وا ڤه‌نه و بۆ بودجه‌یی ژی ئه‌وان 46 هزار هژمارتینە، ئەڤە ئێکە ژوان نموونە و ئاریشێن هه‌ین، ئه‌م ژی بەردەوام ل سەر خەتین ل گەل حکومەتێ و پارتی دیموكراتی كوردسان بۆ هندێ خزمەته‌كا باش بۆ شێخان بهێته کرن .
ناڤهاتی ئاشكرا كر ژی: ره‌زامه‌ندی ل سه‌ر چه‌ندین پرۆژان بۆ قه‌زا شێخان هاتینه‌دان و حكومه‌تا هه‌رێمێ دێ وان پرۆژان دروست كه‌ت وەکو پرۆژێ ئۆڤەرپاسا شێخان و نەخۆشخانا شێخان و وێستگەها کارەبێ و رێیا دوساید و ڕێیه‌ك ل دۆر شێخان بزڤریت و دیسان باژێره‌كێ هه‌ڤچەرخ ژی بهێته دروست کرن، ئه‌م ب هیڤینه خزمه‌ته‌كا باش بۆ خه‌لكێ شێخان بهێته كرن و ئه‌م ل هڤییا بودجه‌یی نه” هەر چەندە بەغدا ئاریشێن مه‌زن بۆ هەرێما کوردستانێ دروست کرینە، بەلێ حکومەتا هەرێما کوردستانێ ب ب ره‌نگه‌كێ به‌رده‌وام ئاریشێن مه چاره‌سه‌ر دكه‌ت، ئه‌م ژی دێ به‌رده‌وام ل سه‌ر خه‌تبین بۆ هندێ دێ داخوازییێن خه‌لكێ مه بهێنه بجهئینان” هه‌روه‌سا بۆ هه‌لبژارتنێن جڤاتێن پارێزگه‌هێن عیراقێ مه به‌رهه‌ڤی كرینه و مه كاندیدێن خۆ ده‌ست نیشان كرینه و هه‌ر ده‌مێ بانگه‌شا هه‌لبژارتنان ده‌ستپێكر ئه‌م ژی دێ ده‌ست ب بانگه‌شێ كه‌ین و دێ كاندیێن خۆ ل سنورێ قه‌زا شێخان سه‌رئێخین.
