سه‌رۆكوه‌زیران مه‌سرور بارزانی سه‌رپه‌رشتییا كۆمبوونا جڤاتا وه‌زیرێن هه‌رێما كوردستانێ كر

ئه‌ڤرۆ چارشه‌مبی سه‌رۆكوه‌زیران مه‌سرور بارزانی، سه‌رپه‌رشتییا كۆمبوونا جڤاتا وه‌زیرێن هه‌رێما كوردستانێ كر.

د كۆمبوونێ دا قوباد ته‌له‌بانی جێگرێ سه‌رۆكوه‌زیران ئاماده‌بوو، د برگا ئێكێدا سیراج بارزانی سه‌رۆكێ راژه‌یا گشتی، راپۆرته‌ك ده‌رباره‌ی میلاكێ گشتی و هێزا كاری یا كه‌رتێ گشتی یێ حكومه‌تا هه‌رێما كوردستانێ پێشكێشكر، ب ژماره‌ و داتا و زانیاریێن هوور ل سه‌ر ئه‌ڤی بابه‌تی پێشنیاز و چاره‌سه‌رییێن پێدڤی به‌رچاڤكرن، ب مه‌ره‌ما دامەزراوەییکردنی پرۆسا دامه‌زراندنێ ل كه‌رتێ گشتی، به‌رچاڤكرنا په‌یكه‌رێ كارگێری و ڕێڤه‌برنا پێكهاتێن وه‌زاره‌ت و دامه‌زراوه‌یێن هه‌رێمێ.

ل دۆر ڤێ چه‌ندێ پێشنیاز و ڕاسپاردێن پێدڤی بۆ رئێكخستنا میلاك و وه‌زیفێن گشتی ب شێوه‌یه‌كێ زانستی دچارچوڤێ قانووناندا هاتنه‌ پێشكێشكرن كو دێ كارتێكرنه‌كا ئه‌رێنی ل سه‌ر كه‌رتێ وه‌زیفا گشتی هه‌بیت، پاشی دناڤ راپۆرتێدا، سه‌رۆكێ جڤاتا راژه‌یا گشتی، ئه‌نجامێ پرۆسا هووربینێ یا هه‌ڤپشكا هه‌ردوو دیوانێن چاڤدێرییا داریی فیدرال و هه‌رێمێ سه‌باره‌ت ب میلاكێ گشتی به‌رچاڤكر ، ئاماژه‌ ب هندێ ژی دا هه‌موو خشته‌ و زانیاری و ژماره‌ بۆ تیما هه‌ڤبه‌شا هووربینییێ به‌رچاڤكرن، دئه‌نجامدا پشتی هووربینییێ خشته‌یێ مووچه‌خۆرێن هه‌رێمێ پێشكێشی هه‌ردوو حكومه‌تا فیدرال و هه‌رێمی هاته‌ كرن كو پێنگاڤه‌كا گرنگه‌ بۆ دابینكرنا شایسته‌یێن دارییێن مووچه‌خۆان.

پشتی دانوستاندنێ ل سه‌ر راپۆرتێ، جڤاتا وه‌زیران چه‌ند پێشنیاز و ڕاسپارده‌یێن جڤاتا راژه‌یا گشتی په‌سه‌ندكرن ژبه‌ر دامەزراوەییکردنا زێده‌تر یا كه‌رتێ وه‌زیفا گشتی و هێزا كاری ل دامه‌زراوه‌یێن هه‌رێمێ.

هه‌روه‌سا هه‌موو وه‌زاره‌ت هاتنه‌ راسپاردن كو هاریكارییا جڤاتا راژه‌یا گشتی بكه‌ن بۆ بجهئینانا ئه‌وان بریارێن هاتینه‌ په‌سه‌ندكرن، فه‌رمانگه‌ها هه‌ماهه‌نگییێ و دووڤچوونێ بۆ ره‌خساندن و هه‌ماهه‌نگییێ بۆ ئه‌ڤێ مه‌ره‌مێ هاته‌ راسپاردن.

د برگه‌یه‌كا دییا راپۆرتێدا، دانوستاندن ده‌رباره‌ی بجهئینانا چه‌ندین مادده‌ و برگێن دیێن قانوونا چاكسازییێ ب تایبه‌تی د بوارێ خانه‌نشینییێدا هاتنه‌ كرن، كو ژلایێ عەبدولحەکیم خەسره‌وڤه‌ سكرتێرێ لژنا بلند یا ب جهئینانا قانوونا چاكسازییێ هاته‌ خواندن.