ئاژانسا خانی:
رێڤه‌به‌رێ گشتییێ وەبەرھێنانێ ل ئیدارا سەربەخۆیا زاخۆ گۆت: سێ پارکێن مه‌زن ل سەر رووبەرێ ٥٨٠ دۆنه‌مێن ئه‌ردی ل باژێرێ زاخۆ دێ هێنه چێکرن و هه‌موو خزمەتگوزاری دێ دناڤا وان پاركان دا هه‌بن و ڤێ چه‌ندێ دێ کاریگەری ل سەر زێده‌بوونا ڕێژا كه‌سكاتییێ ل زاخۆ هه‌بیت.
جگەرخوین تاھر، زێده‌تر بۆ ئاژانسا خانی دبێژیت: بڕیارە سێ پارکێن مه‌زن ل ئیدارا سەربەخۆیا زاخۆ بهێنه چێكرن، دیزاین و نەخشەیێ وان ھەرسێ پاركان هاتییه پێشکێشكرن بۆ رێڤەبەرییا گشتییا وەبەرھێنانێ ل ئیدارا سەربەخۆیا زاخۆ و ل سالا بهێت كار دێ د چێكرنا وان پاركان دا هێته كرن و د ماوه‌یێ دو سێ سالان دا دێ هێنه دروستكرن.
ناڤهاتی گۆت ژی” ئێك ژ وان پارکان پارکا سیپانە كو ل سەر ڕووبەرێ ٩٠ دۆنه‌مێن ئه‌ردی دێ هێته چێكرن ژ چەندین پشكان پێکھاتییە و چەندین یەکەیێن گەشتیاری و خزمەتگوزارییان تێدا هه‌نە، هه‌روه‌سا پارکا جه‌نه‌رال پاركا چه‌مسیرمۆیی دێ ل سه‌ر رووبه‌رێ ١٧٠ دۆنه‌مێن ئه‌ردی هێته چیكرن و جه‌نه‌رال پاركا بێدارێ دێ ل سه‌ر رووبه‌رێ ٣٢٠ دۆنه‌مێن ئه‌ردی ل سه‌ر رووبارێ خابیری هێته چێكرن و ئه‌و پاركه دێ رێژا كه‌سكاتییێ ل زاخۆ زێده‌كه‌ن و د هه‌مان ده‌مدا دێ گه‌شتییار ژی پتر قه‌ستا زاخۆ كه‌ن و ده‌لیڤێن كاری ژی دێ زێده بن.
