د پرانییا وەلاتێن پێشکەفتیدا، خودان پێدڤیێن تایبەت ل گۆرەی پێدڤییێن خوە، خودان چەندین مافێن تایبەتن د ژیانێدا و ئەرکێ خودانکرن و سەخبێری و تەندروستی و فێرکرن و خواندنا وان د ستۆیێ حکومەتێ دایە. سەرەڕای نەبوونا چ مافێن سەرەتایی یێن ژیانێ و دابینکرنا مافێن وان یێن تایبەت، خودان پێدڤییێن تایبەت رویبرویی چەندین ئاستەنگ و نەخوەشییێن دی دبن لڤی وەلاتی و رۆژانە توشی هندەک کارەساتێن دژوار دبن ژلایێ جڤاکی بخوە.
ژمێژەیە دیاردەیەکا کرێت د جڤاکێ مەدا سەرهلدایە، ئەوژی دیاردا سڤکاتیکرنێ یە ب بیرکول و خودان پێدڤییێن تایبەت و بەڵاڤکرنا ڤیدیۆ و وێنەیێن وایە ب شێوەیەکێ نەشیاو و کومێدی د سۆشیال میدیایێدا، ژ پێخەمەت ب دەستڤەئینانا کۆمێنت و لایکان.
بەردەوام لایڤ و ڤیدیۆ و دێکیۆمێنت و وێنەیێن بیرکولان ب شێوەیەکێ نەشیاو د سۆشیال میدیایێدا بەلاڤ دبن و هندەک کەس هەنە بیرکول و خودان پێدڤییێن تایبەت ژبۆی مەرەمێن خوەیێن تایبەت بکاردئینن.
ژبلی نە دابینکرنا ئەرک و مافێن وان، هەرچنەبت یا فەرە ئێدی ڕێک لبەر ئەڤێ دیاردێ بهێتەگرتن و ئەو کەسێن خودان پێدڤییێن تایبەت بۆ خوە د سۆشیال میدیایێدا بکاردئینن و سڤکاتییێ پێ بکەن، ڕوویبڕووی دادگەهێ بهێنەکرن و پێرابوونێن یاسایی ل هەمبەر ئەڤان کەسان بهێنە وەرگرتن.
یافەرە رێڤەبەرییا گەشەپێدانا جڤاکی ئاورەکا جدی ل ئەڤی بابەتی بکەت و هەمی هەولان بدەت خودان پێدڤییێن تایبەت ژ ئەڤێ سڤکاتی پێکرنێ رزگاربکەت و کەرامەت و کەسایەتییا ئەڤان مرۆڤێن دلوڤان ژ دەستێ تامسارێن سۆشیال میدیایێ بینت دەر و بپارێزت.
