كونسۆلێ فره‌نسا: هه‌رێما كوردستانێ بوویه‌ جهێ پێكڤه‌ژیانێ

كونسۆلێ گشتییێ فره‌نسا ل هه‌رێما كوردستانێ بێژیت: د ده‌مه‌كیدا هێشتا ڕه‌گه‌زپه‌رستى ل سه‌ر مرۆڤایه‌تییێ گه‌فه‌، ده‌ڤه‌رێن هه‌رێما كوردستانێ بووینه‌ جهێ پێكڤه‌ژیانێ.

یان برێم كونسۆلێ گشتییێ فره‌نسا ل هه‌رێما كوردستانێ سه‌ره‌دانا قه‌زا ئامێدییێ ل سنۆرێ پارێزگه‌ها دهۆكێ كر، دگه‌ل وارشین سلێمان قائیممقامێ قه‌زایێ كۆمبوو و گوتوبێژا نووژه‌نكرنا قوتابخانه‌یا مێژووییا ( قه‌به‌هان ) كر.

كونسۆلێ فره‌نسا د پرێسكۆنفرانسه‌كیدا ئاماژه‌ ب هندێ كر، هه‌رێما كوردستانێ و ئامێدى جهێ پێكڤه‌ژیانێنه‌، هه‌ر چه‌نده‌ ڕه‌گه‌زپه‌رستى و تۆندره‌وى هێشتا  ل سه‌ر مرۆڤان گه‌فه‌.

یان برێمى گوت: شاره‌زاییێن وان ل پاراستنا جهێن شوینوارى بووینه‌ ئه‌گه‌ر، ئه‌وان ل چه‌ندین ده‌ڤه‌رێن جیهانێ دناڤ واندا هه‌رێما كودستانێ، پرۆژه‌یێن تایبه‌ت بۆ پاراستنا شوینواران هه‌بن، كو دبنه‌ ئه‌گه‌رێ ره‌خساندنا ده‌رفه‌تێن كارى بۆ گه‌نجان.

یان برێمى به‌حس ل هندێ كر، فره‌نسا دێ ل پاشه‌رۆژێ هنده‌ك پرۆژه‌یێن دى بۆ ده‌ڤه‌رێ هه‌بن، ب رێیا وان پرۆژان گرنگییێ ب پێكڤه‌ژیانا ئاشتییانه‌ ده‌ن.