په‌یڤدارێ ده‌سته‌یا وه‌به‌رهێنانێ ل هه‌رێما كوردستانێ ڕاگه‌هاند، ل هه‌موو باژێرێن هه‌رێما كوردستانێ ب تنێ ل ئه‌ڤساله 154 پرۆژان ب كۆژمێ چار ملیار و 300 ملیۆن دۆلاران مۆله‌ت ژ وه‌به‌رهێنانێ وه‌رگرتییه كو 29 ژ وان پرۆژه‌یان ل دهۆكێ بوون.
به‌رگه‌شت ئاكره‌یی، په‌یڤدارێ ده‌سته‌یا وه‌به‌رهێنانێ ل هه‌رێما كوردستانێ بۆ ئاژانسا خانى دیاركر، ژ ده‌ستپێكا سالا 2023ێ هه‌تا نوكه، 154 ب كۆژمێ چار ملیار و 300 ملیۆن دۆلاران پرۆژان مۆله‌ت ژ وه‌به‌رهێنانێ وه‌رگرتییه، كو هه‌موو باژێر و ئیداره‌یێن سه‌ربه‌خۆیێن هه‌رێما كوردستانێ ڤه‌دگریت.
په‌یڤدارێ ده‌سته‌یا وه‌به‌رهێنانێ گۆت: ل هه‌ولێرێ 50 پرۆژه‌یان مۆله‌ت وه‌رگرتییه، ل هه‌له‌بجه سێ پرۆژه‌یان، ل گه‌رمییان 12 پرۆژه‌یان، ل راپه‌رین پێنج پرۆژه‌یان، هه‌روه‌سا ل سلێمانییێ ژی 43 پرۆژه‌یان مۆله‌ت وه‌رگرتییه، ل سۆران چار، ل زاخۆ هه‌شت، ل دهۆكێ ژی 29 پرۆژه‌یان ب كوژمێ 105 ملیۆن دۆلاران مۆله‌ت وه‌رگرتییه.
بەرگەشت ئاکرەیی ئاماژه ب هندێ ژی كر: هه‌موو ئه‌و مۆله‌تێن ل سالا 2023ێ هاتینه دان زێده‌تر بۆ كه‌رتێ ئاكنجیبوونێ بوون، پلا دووێ كه‌رتێ بازرگانییه، پاشی پێشه‌سازی دهێت، پاشی كه‌رتێ ساخله‌مییێ و كه‌رتێن په‌روه‌ردێ و چاندنێ و هونه‌ری و وه‌رزشی دهێن.
به‌حس ل هندێ ژی كر، وان ژلایێ كارگێریڤه ڕێكارێن خوه هه‌نه، ئه‌وێن كو پرۆژا پێشكێشی ده‌سته‌یا وه‌به‌رهێنانێ دكه‌ن، لژنه‌یه‌كا تایبه‌تمه‌ند هه‌یه هه‌روه‌سا فه‌رمانگه‌هه‌كا تایبه‌ت ژی هه‌یه، ب ناڤێ فه‌رمانگه‌ها مۆله‌ت و هه‌لسه‌نگاندنان ئه‌و پرۆپۆزه‌له ب ڕێیا لژنا تایبه‌ت و ژلایێ مه‌رجێن قانوونى و كارگێریڤه دهێنه هه‌لسه‌نگاندن.
گۆت ژی: پشكه‌كا هه‌ره مه‌زن یا پرۆژه‌یان ده‌ست ب جهئینانا مۆله‌تێ كرییه.
