ب ناڤێ خودایێ مەزن و دلوڤان ب هەلكەفتا سەرێ سالا نوی یا زاینی پیرۆزباهییێ ل وەلاتییێن خوشتڤی یێن كوردستانێ و مالباتێن سەربلندێن شەهیدان و پێشمەرگەیێن قەهرەمان دكەم و هیڤییا خێر و خوشییێ بۆ هەمی لایەكی دخوازم. د دەمەكیدایە بەرەڤ دەستپێكا سالا نوی دچین كو دەڤەر ب گشتی ل بن گەفێن نەئارامی و دروستكرنا قەیران و شەڕ و ئالۆزییان دایە. پێدڤییە هەمی لایەك ئەوێ چەندێ باش بزانن مافێ گەلێن دەڤەرێ یە بشێن د ئارامی و ئاشتی و دویر ژ ناكۆكییا بژین و ئێدی دەڤەرا مە شیانێن ئاریشە و توندوتیژی و تیرۆر و نەسەقامگێرییێ نینە. د ئەڤێ دەربارەی دا ئەركێ جڤاكێ نیڤدەولەتی یە ژ پێخەمەت پاراستنا ئاشتی و ئاسایش و ڕێگرتن ل بەرفرەهبوونا قیران و گەفان ل دەڤەرا مەدا ڕۆلێ خۆ بگێریت و كار ب پێگرییان بكەت. د سالا نوی دا ئەو چاڤەڕێ بوونە ژ حكومەتا عیراقا فیدرال هەیە كو ب ئاراستەیێ چارەسەركرنا ئاریشەیان دگەل هەرێما كوردستانێ و پێگیر بوون ب بنەماییێن دەستووری و بەرژەوەندییا گەلێن عیراقێ پێنگاڤان ب هاڤێژیت. پەیاما گەلێ كوردستانێ ژی بۆ هەمی لایەكی هەمی دەما پەیاما دانوستاندن و لێكتێگەهشتن و چارەسەرییێ بوویە و ئەڤە باشترین ڕێكە بۆ ب جهئینانا سەقامگیری و ئارامی و پێشكەفتنێ. هیڤیدارم سالا 2024ێ سالا ب دووماهیئینانا ئاریشەیێن عیراقێ و دەڤەرا مە بیت و ئارامییێ بۆ هەمی وەلاتییێن كوردستان و عیراق و گشت دەڤەرێن مە بیت.
