پێشەوا هەورامی، پەیڤدارێ حكومەتا هەرێما كوردستانێ ل دور هێرشا شەڤا بووری یا سەر بارەگایێن هێزێن پێشمەرگەی، بەیانەك بەلاڤكر.
دەقێ پەیاما پەیڤدارێ حكومەتێ:
شەڤا بووری، ب دوو درۆنێن بۆمبڕێژكری هێرش ل سەر بارەگایێ هێزێن پێشمەرگێ كوردستانێ ل سنۆرێ پیرمام – هەولێر هاتەكرن، خۆشبەختانە زیانێن گیانی نەبوون و بتنێ زیانێن ماددی هەبوون.
ئەو هێرشا تیرۆرستی ژلایێ هێزەكا ژیاسایێ دەركەڤتی ب هاریكارییا جاش و هاریكارێن وان بۆ سەر بنگەهەكێ هێزێن پێشمەرگەی هاتییەكرن، یا ب مەترسی یە و شەڕ فرۆتنە.
ئەم ئەوان لایەنان و حكومەتا فیدڕالی ب بەرپرس دزانین بەرامبەر ئەڤان هێرشێن ترسنۆكانە، ژبەركو ئەڤ گڕۆپێن ژیاسایێ دەركەڤتی ژلایێ حكومەتا فیدڕال ڤە بۆدجە و مووچە پێ دهێنەدان و دهێنە چەكداركرن و ل بەر چاڤێن حكومەتا عیراقێ هاتنوچوونێ دكەن و چەك و مووشەك و درۆنان ڤەدگوهێزن و هێرشێن تیرۆرستی دكەنە سەر سازییێن فەرمی و سەربازی.
ددەمەكی دا كو حكومەتا عیراقێ یا بێ دەنگ و بێ شیانە بەرامبەر وان، لێ یا ئازایە د بڕینا قویتێ خەلكێ كوردستانێ دا و ب هەمان پارە ڤان گڕۆپان پارەدار دكەت.
ئەم چاڤەڕێی بەرسڤ و پێنگاڤێن كرداری یێن بەڕێز سەرۆكوەزیرێن حكومەتا فیدڕال دكەین بۆ سزادانا ڤان گڕۆپان و هەر بەرسڤەكا د دەمێ گونجای دا ب مافێ خۆ دزانین. داخواز ژی ژ هەمی دۆست و لایەنان دكەین كو ل سەر وێ هێرشا تیرۆرستی بێ دەنگ نەبن و پشتەڤانێن مە بن بۆ هەر بەرسڤەكا كو ئەم ب گونجای دزانین.
خۆدایێ مەزن پشتەڤانێ مە بیت
