د. فارس بریفکانی: پشتی پەسەندکرنا ئەنجامان جڤاتا پارێزگه‌ها نەینەوا دێ کۆمبیت

 

ئاژانسا خانی:

به‌ربژاره‌كێ سەركەفتییێ پارتی بۆ جڤاتا پارێزگەها نەینەوا گۆت: پشتی پەسەندكرنا ئەنجامێن دووماهییێ یێن هەلبژارتنان جڤاتا پارێزگەها نەینەوا دێ كومبیت و دبێژیت” بێی پارتی حكومەتا خۆجهی یا نەینەوا پێكناهێت . فارس بریفكانی كاندیدێ سەركەفتی یێ پارتی بۆ جڤاتا پارێزگەها نەینەوا راگەهاند” پشتی پازدە رۆژان ژ پەسەندكرنا ئەنجامێن دووماهییێ یێن هەلبژارتنان ژلایێ كۆمسیونا بلندا هەلبژارتنان جڤاتا پارێزگەهان دشێن كۆمبوونا خۆ یا ئێكێ برێڤە ببەن.

ناڤهاتی زیده‌تر بۆ گۆت” بەری دو حەفتییان ئەنجام هاتنە راگەهاندن” بەلێ ژ ئەگەرێ هەبوونا هندەك سكالایان هێشتا نەهاتینە پەسەندكرن وبریارە د چەند رۆژێن بهێن دا سكالا بهێنە ئێكلاكرن و ئەنجامێن دووماهییێ بھێنە پەسەندكرن ” هەروه‌سا ل پارێزگەها نەینەوا ئەم چاڤەرێ پەسەندكرنا ئەنجامێن دووماهییێ یێن هەلبژارتناینە و پاشی دێ بەیانەك ژ پارێزگەهێ هێتە دان و داخواز ژ جڤاتا هەلبژارتی یا پارێزگەها نەینەوا كەت كو كۆمبوونا خۆ برێڤە ببەن.

 د. فارس بریفكانی گۆت ژی” راستە داخواز ژ پارتی هاتییە كرن بۆ پێكئینانا حكومەتا خۆجهی یا نەینەوا چونكی پارتی پێگەهەكێ ب هێز ل نەینەوا هەیە.