دوو سه‌نته‌رێن جوانكارییێ ل دهۆكێ هاتنه‌ داخستن

ئاسایشا پارێزگه‌ها دهۆكێ ڕاگه‌هاند، بۆ به‌رژه‌وه‌ندییا گشتى و پاراستنا گیانێ وه‌لاتییان، دوو سه‌نته‌رێن جوانكارییێ ل پارێزگه‌ها دهۆكێ هاتنه‌ داخستن و ئه‌و كه‌سێن لێ كار دكه‌ن ژى ڕه‌وانه‌ى دادگه‌هێ هاتنه‌كرن، ژبه‌ركو ئه‌وان باوه‌رنامه‌ و ده‌ستوورى نه‌بوون و خوه‌ ب نوشدارێن جوانكارییێ دابوونه‌ نیاسین.

پشكا ڕاگه‌هاندنا ئاسایشا پارێزگه‌ها دهۆكێ دیاركر، پشتى دووڤچوونێن به‌رده‌وام ژلایێ ئاسایشا پارێزگه‌ها دهۆكێڤه‌ و هه‌ڤكارییا سه‌ندیكا نوشدارێن كوردستانێ تایێ دهۆكێ، دوو كه‌یس ل دادگه‌ها دهۆكێ هاتنه‌ تۆماركرن كو چه‌ند كه‌س ل سه‌نته‌رێن جوانكارییێ ب ناڤێ( نوشدارێ جوانكارییێ ) كاردكه‌ن، پشتى په‌رێن لێكۆلینێ هاتینه‌ ڤه‌كرن و دووڤچوون هاتییه‌ كرن، دیاربوو كو وان كه‌سان چ باوه‌رنامه‌ نه‌بووینه‌ و ده‌ستوورییا كارێ نوشدارێ جوانكارییێ  ب تایبه‌تى یێ ( فیله‌ر و بوتكس )ئان ژى نه‌بووینه‌، ئه‌وان ب فێلبازییێ و ب مه‌ره‌ما ب ده‌سخستنا پاره‌ى ئه‌ڤ كاره‌ دكر، پشتى ئه‌و كه‌سه‌ هاتینه‌ ده‌سته‌سه‌ركرن، ڕه‌وانه‌ى دادگه‌هێ هاتینه‌كرن و دێ ل دووڤ قانوونێ سه‌ره‌ده‌رى دگه‌لدا هێته‌كرن.

ئاسایشا پارێزگه‌ها دهۆكێ وه‌لاتى ئاگه‌هداركرن كو گه‌له‌ك هشیارى سلامه‌تییا خوه‌ بن، به‌رى سه‌ره‌دانا سه‌نته‌رێن جوانكارییێ بكه‌ن دڤێت خوه‌ پشت ڕاستبكه‌ن، نوشدارێن كارێ جوانكارییێ ژى دكه‌ن دڤێت د به‌رنیاس بن و سه‌نته‌رێن وان ده‌ستوورییێن فه‌رمى هه‌بن.