سه‌رۆكێ حكومه‌تا هه‌رێما كوردستانێ پێشوازى ل بالیۆزێ نه‌رویج ل ئوردن و عیراقێ كر، بالیۆزێ نه‌رویج دلگرانییا خوه به‌رامبه‌ر هێرشا ڤێ دووماهییێ یا ل سه‌ر هه‌ولێرێ هاتییه كرن، ده‌ربرى.
مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل ئیسپن لیندباك بالیۆزێ نه‌رویج ل ئوردن و عیراقێ كر، د كۆمبوونا واندا پێشڤه‌برنا په‌یوه‌ندییێن دوولایانه و دووماهى پێشهاتێن عیراق و ده‌ڤه‌رێ هاتنه گوتوبێژكرن.
بالیۆزێ نه‌رویجێ دلگرانییا خوه به‌رامبه‌ر وێ هێرشا ل ڤێ دووماهییێ ل سه‌ر هه‌ولێرێ هاتییه كرن ده‌ربرى، هه‌ڤخه‌مییا خوه بۆ كه‌سوكارێن قوربانییێن هێرشێ ب سه‌رۆكێ هه‌رێمێ گه‌هاند، پشته‌ڤانییا وه‌لاتێ خوه بۆ ئارامى و سه‌قامگێرییا هه‌رێما كوردستانێ دووپاتكر، مه‌نده‌هوشییا خوه ب خوه‌راگرى و ئێك هه‌لویستییا خه‌لكێ كوردستانێ به‌رامبه‌ر وێ هێرشێ نیشاندا.
سه‌رۆكێ حكومه‌تا هه‌رێما كوردستانێ سوپاسییا پشته‌ڤانى و هه‌ڤسوزییا نه‌رویجى كر و دووپاتكر، پێدڤییه كۆمه‌لگه‌ها نێڤده‌وله‌تى ڕۆلێ خوه یێ گرنگ و كارا دپاراستنا ئاسایشا هه‌رێما كوردستانێ و دابینكرنا مافێن وێ یێن دارایدا بگێریت.
