ئاژانسا خانی:
په‌یڤدارێ دەستەیا وەبەرھێنانێ ل ھەرێما کوردستانێ دیار كر: ل سەر راسپاردا مه‌سرور بارزانی” سەرۆکێ حکومەتا ھەرێما کوردستانێ” کار دھێته کرن بۆ هندێ وەبەرھێنەرێن بیانی بهێنه ھەرێما کوردستانێ، نوكه بەردەوام وەبەرھێنەرێن بیانی دهێنە ھەرێما کوردستانێ و پروپۆزه‌لان بۆچێكرنا پڕۆژان پێشکێش دکەن، ئه‌م ژی ھەموو ئاسانکارییان بۆ دکەین بۆ ئەنجامدانا پڕۆژێن نوو، نوكه قەبارێ وەبەرھێنانا بیانی ل ھەرێمێ گەهشتییە پتری 10 ملیار دۆلاران و وان پرۆژان ب ھزاران دەلیڤێن کاری ل ھەرێما کوردستانێ بۆ خەلكێ په‌یدا كرینه.
بەرگەشت ئاکرەیی، زێده‌تر بۆ ئاژانسا خانی گۆت: قەبارێ وەبەرھێنانا ھەرێما کوردستانێ ل گەل وه‌لاتێن بیانی، ب تایبەتی وه‌لاتێن وەکو قەتەر، سعوودییه و ئیماراتێ د ئاسته‌كێ بلند دایە” ب ره‌نگه‌كێ گشتی قەبارێ وەبەرھێنانا ھەرێما کوردستانێ ژ سالا 2006 ێ هه‌تا نوكه ل گه‌ل وه‌لاتێن بیانی دگه‌هیته 10 ملیار و 65 ملیۆن و 539 هزار و 979 دۆلاران و ھەموو سێکتەرێن وەبەرھێنانێ ڤه‌دگرن، وەبەرھێنانا ھه‌ڤپشك ژی دگه‌هیته ملیاره‌ك و 500 ملیۆن دۆلاران.
ناڤهاتی گۆت ژی: هژماره‌كا وه‌لاتێن بیانی ل ھەرێما کوردستانێ وەبەرھێنانێ دکەن، ژ وان ژی” مسر، بریتانیا، فرەنسا، لبنان، سوید، رووسییا، تورکیا و نیوزله‌ندا و چین و جۆرجیا و ئیمارات و ئیران و ئه‌مریكا و قه‌ته‌ر و چه‌ندین وه‌لاتێن دیتر” هه‌تا نوكه وان وه‌لاتان 46 پرۆژێن وه‌به‌رهێنانێ ل هه‌رێما كوردستانێ ئه‌نجامداینه.
