دهۆك دێ بیته‌ جهه‌كێ گه‌شتیارییا ساخله‌مییێ

ڕێڤه‌به‌رێ گشتییێ وه‌به‌رهێنانێ ل پارێزگه‌ها دهۆكێ ڕاگه‌هاند، ئه‌و بزاڤێ دکەن دهۆكێ بكه‌یه‌ جهه‌كێ گه‌شتیارییا ساخله‌می و خه‌لكه‌ك ژ ده‌رڤه‌ى پارێزگه‌ها دهۆكێ قه‌ستا دهۆكێ بكه‌ت بۆ وه‌رگرتنا چاره‌سه‌رییێ، ئه‌ڤه‌ دێ بیته‌ ئه‌گه‌ر کو پتر ده‌لیڤێن كاركرنێ بۆ ده‌رچوویان په‌یدابن.

هه‌ڤال سه‌دیق، ڕێڤه‌به‌رێ گشتییێ وه‌به‌رهێنانێ ل پارێزگه‌ها دهۆكێ  دیاركر، هه‌ماهه‌نگی دگه‌ل لایه‌نێن په‌یوه‌ندیدار هاتییه‌ كرن كو  دهۆك پێدڤى ب چ جۆره‌ پرۆژایه‌ و دێ پرۆژه‌ ژی ب سه‌ر قه‌زا و ناحییان هێنه‌ بجهئینان، دكه‌رتێ ساخله‌مییێ دا ژى دێ هنده‌ك پرۆژه‌ هێنه‌ بجهئینان، ده‌رگه‌هـ دڤه‌كرینه‌ بۆ دانا مۆله‌تێ بۆ بجهـ ئینانا پرۆژێن وه‌به‌رهێنانێ ب تایبه‌تى ژى پرۆژێن گرنگ بۆ ژێرخانا ئابوورییا پارێزگه‌ها دهۆكێ و پرۆژه‌ دێ ده‌لیڤێن كاركرنێ بۆ خه‌لكێ په‌یدا كه‌ن.