سكرتێرێ گشتییێ وەتەنی هەدەفی راگەهاند، ئەڤرۆ شاندەكێ عەرەب، توركمان و پارتی دیموكراتی كوردستان ل دۆر بابه‌تێ پێكئینانا حكومەتا خۆجهی یا كەركووكێ كۆمبن.
ئیسماعیل حەدیدی سكرتێرێ گشتییێ پارتا هەدەفی وەتەنی، كو پارتەكا عەرەبی سوننەیە راگەهاند، بریارە ئەڤرۆ شاندەكێ عەرەب و توركمانان سەرەدانا هەولێرێ بكەن و دگەل پارتی دیموكراتی كوردستان كۆمبن، بۆ هندێ دانوستاندنێ ل دۆر بابه‌تێ پێكئینانا حكومەتا خۆجهی یا كەركووكێ بكەن.
حەدیدی ئاماژە ب هندێ كر، لژنەیەك دناڤبەرا عەرەب و توركمان و كورداندا پێكئینایە و ئەڤرۆ لژنە دێ كۆمبیت.
ناڤبری بێی كو ئاگەهداربیت ئێكەتی نیشتیمانی كوردستان د كۆمبونێدا دێ پشكداربیت یان نە بەلێ گوت: پێدڤییە ئێكەتی پشكداربیت ژبەركو ئێكەتی و پارتی ل سەر هندێ ڕێككەڤتینە ئێك كوتلەبن.
