جڤاتا وه‌زیرێن هه‌رێما كوردستانێ ئه‌ڤرۆ چارشه‌مبیێ ب سه‌رپه‌رشتیا سه‌رۆك وه‌زیرێن هه‌رێمێ مه‌سروور بارزانى ئه‌ڤرۆ چارشه‌مبیێ كۆمبوو.
ل گۆره‌ى راگه‌هاندنه‌كا فه‌رمانگه‌ها میدیا و زانیاری “د ده‌ستپێكا كۆمبوونێ دا، به‌حس ل پشكدارى و كۆمبوونا شاندێ هه‌رێما كوردستانێ د گۆپیتكا جیهانى یا حكومه‌تان دا ل باژێڕێ دوبه‌ى ل رۆژێن 12 تا 14ى ڤێ هه‌یڤێ هاته كرن”.
هه‌روه‌سا دیار ژى كریه “د بڕگه‌یا ئێكێ یا كۆمبوونێ دا، دانوستاندن ل دۆر پرۆژه‌بڕیاره‌كێ ب ئارمانجا رێكخستنا رسوماتان و كڕێ و تێچوویێن تایبه‌ت ب تۆماركرنا كۆمپانیان ل هه‌رێما كوردستانێ ب ئاراسته‌یێ پێشكێشكرنا كارئاسانیێ و ره‌خساندنا ژینگه‌هه‌كا گونجایتر و بساناهیتر بۆ دامه‌زراندنا كۆمپانیان ل هه‌رێمێ ب تێچوویێن كێمتر و ده‌مه‌كێ كێمتر هاته كرن، پشتى دانوستاندنێ جڤاتا وه‌زیران خشته‌یێ نوى یێ وان رسوماتێن په‌یوه‌ندیدار ب دامه‌زراندن و تۆماركرنا كۆمپانیان په‌سه‌ندكر كو پشتى به‌لاڤبوونا وان د رۆژنامه‌یا وه‌قائیعى كوردستان دا دێ كه‌ڤنه د وارێ بجهئینانێ دا”.
هه‌ر ل گۆره‌ى وێ راگه‌هاندنێ”بڕگه‌یا دوێ یا كۆمبوونێ بۆ پێداچوونا كه‌رتێ باجێ ل هه‌رێما كوردستانێ و ده‌ستنیشانكرنا كێشه و چاره‌سه‌ریان یا ته‌رخانكرى بوو، كه‌مال وه‌رتى رێڤه‌به‌رێ گشتى یێ باجان ل وه‌زاره‌تا دارایى و ئابوورى ل كۆمبوونێ مێهڤان بوو و راپۆرته‌كا به‌رفره‌هـ ل دۆر كه‌رتێ باجان ل هه‌رێمێ بۆ جڤاتێ پێشكێشكر”.
ئاماژه دایه وێ چه‌ندێ ژی “جڤاتا وه‌زیران دوپاتى ل سه‌ر وێ چه‌ندێ كر كو پێدڤیه وه‌زاره‌تا دارایى و ئابوورى د چاكسازیكرنێ د سیسته‌مێ باجێ دا و رێگرتنێ ل خۆڤه‌دزینا باجده‌ران ل پرۆژه و كۆمپانیان ژ پێدانا باجێ به‌رده‌وام بیت و پێدڤیه باج وه‌سا بهێنه رێكخستن كو ببنه ئه‌گه‌رێ گه‌شه‌پێدانا ئابوورى و د خزمه‌تا وه‌لاتیێن هه‌رێما كوردستانێ دا بیت و ره‌وشا ژیارێ و ئابوورى یا وه‌لاتیان ل به‌رچاڤ وه‌ربگریت و بارگڕانیێ ل سه‌ر كاسبكار و كارسازان دروست نه‌كه‌ت”.
