پەرلەمانتارا کورد لەیلا زانا سەرا دوو پەیڤێن کوردی دەهـ سالان هاتە زیندان کرن. مامۆستایەکا خانم ل ڕۆژهەلاتێ کوردستانێ ژی سەرا بكارئینانا زمانێ کوردی چەندین سالا هاتە زیندانیکرن. ل ناڤ دەستوورێ عیراقێدا کوردی و عەرەبی زمانێن فەرمینە و ڕێ پێ هاتیەدان ل پەرلەمان و جڤاتا وەزیران و کۆنفرانسێن نیڤدەولەتی ب کوردی باخڤن و حەتا نوکە مە نەدیتیە پەرلەمانتارەك ب زمانێ شرینێ کوردی باخڤیت!!
ل دەف دوژمنێن مە ب کارئینانا زمانێ کوردی مەترسییێ دئێخیتە سەر ئاسایشا نیشتمانیا وان و بەس ب وێ دێ دزانی کو چەند زمانێ کوردی بۆ مە یێ گرنگە و ل کوردستانێ ئەم زمانێ خۆ ژ بیردکەین و ب شانازیڤە تابلویێن عەرەبی و ئینگلیزی بۆ جهێن گشتی ب کاردئینین!!
دسەردەمێ جیهانگیری و پەیدابوونا نفشێ فەیسبووک و ئینستگرام و یوتوبیدا زمانێ زکماکییێ مە کوردی ب هەر چەند دەڤۆکێن خۆ کەڤتیە دمەترسییێدا.
دنوکە دا عەرەبی و ئینگلیزی زمانێ فەرمییێ زانینگەهێن مەنە، هەتا گەلەک بەرپرسێن مە گەلەک جاران ب پەسنڤە ل جڤاتان دبێژن کو زارۆکێن مە فول ئینگلیزی دئاخڤن و باش کوردی نزانن. ل وی تابقێ کو ئەز دژیم ب مخابنیڤە ل زاخۆ زارۆکێن من و جیرانان ب زمانێ ئینگلیزی دئاخڤن و دانوستاندنێ گەل ئێك و دوو دکەن.
ل زۆربەیا کافتێری و خوارنگەهـ و ئوتێلێن هەولێر و سلێمانی و دهۆکێدا دڤێت تو ب عەرەبی یان ژی ب ئینگلیزی دانوستاندنێ ل گەل کارمەندان بکەی و یا بوویە شەرم ئەگەر ئێك ژ ڤان دوو زمانان نەزانی!
چەند جاران ل دەمێ پێشکێشکرنا سمیناران، ل دەمێ ئەز ب دەڤۆکا سندی و گۆندیا خۆ یا شرین دئاخڤم، ب پێکەنین و ترانەڤە ل من ب خۆ هاتیە نێرین. ئەز ب خۆ چەند سالەکێن کێم ل ژیێ مەزن ل کوردستانێ ژیایمە و من زارۆکاتییا خۆ ل ئیران و تورکیا بریە سەری. بەلێ باب و دەیکێن من و ب تایبەتی بابێ من وەك پۆلیسەکێ توند ل بەر دەڤێ مە ڕاوەستیایە کو نە بەس ئەم ب کوردی ب ئاخڤین، لێ ب دەڤۆکا گۆندێ خۆ ژی بشێن باخڤین. ب سەربلندیڤە و سەرفرازیڤە ئەڤرۆ ئەم منەتدارێن دەیك و بابێن خوینە کو شیانە ببینە ئەگەرێ وێ چەندێ ئەم زمان و فەرهەنگێ خۆ بپارێزین و خۆ هندا نەکەن.
گرنگە کو هەر کەسەك د مالدا و ل گەل هەڤالێن خۆ ب دەڤۆکا خۆ باخڤیت و خوێندنگەهێن مە ب زمانێ دەڤەرێ زارۆکێن خۆ فێری زانستی بکەن. ژ بۆ کوردێن ل دەرڤە و ب تایبەتی ئەورۆپا دژین پاراستنا زمانی ب زەحمەتر و بارێ وان گرانترە. هیڤیە ل مالا خۆ ب دەڤۆکا شرینا خۆ ل گەل زارۆکێن خۆ باخڤن.کوردی ناسنامەیا مە کوردانە و ژ دەست دانا زمانی و فەرهەنگا کوردی، ژ دەستدانا ناسناما کوردی یە.
