ئاژانسا خانی:
بریکارێ وەزارەتا چاندنێ و ژێده‌رێن ئاڤێ ل حكومه‌تا هه‌رێمێ دیار كر: نوكه به‌رهه‌ڤی بۆ ب بازارکرنا بەرھەمێن گەنمێ جۆتیاران دەستپێکرییە و دیسان دو لژنه ژ لایێ ھەرێما كوردستانێ و بەغدا پێکھاتینه بۆ دیارکرنا پشکا ھەرێما کوردستانێ.
کەریم سلێمانی، زێده‌تر گۆت: ل سالا بوری لژنەكا ھه‌ڤپشك دناڤبه‌را ھەردو وەزارەتێن چاندنا ھەرێمێ و عێراقێ ھەبوو” بۆ بابه‌تێ ب بازارکرنا گەنمێ جۆتیارێن ھەرێما کوردستانێ، هه‌روه‌سا لێکتێگەهشتنه‌ک دناڤبه‌را ھەردو ئالییان دا هه‌بوو” كو لژنەكا ھه‌ڤپشك دناڤبه‌را ھەردو ئالییان دا بهێته دروست كرن، داكو پێشوەخت به‌رهه‌ڤی بهێنه کرن چەند زه‌ڤییێن ھەرێما کوردستانێ كرینه گه‌نم، دیسان ژلایێ حکومەتا عێراقێ لژنەک هاتییه پێکئینان و مه ژی لژنەك پێکئینایە.
ناڤهاتی گۆت ژی: بریارە ل حه‌فتییا بهێت لژنەك ژ بەغدا سەره‌دانا ھەرێما کوردستانێ بکه‌ت، به‌ری هاتنا وێ لژنێ مە به‌رهه‌ڤییێن خۆ کرینە، دیسان ژ لایێ کۆمپانییه‌كا بسپۆرڤە مه دەست ب رێپیڤانه‌كێ کرییه داكو بزانین ئەڤ ساله چەند زەڤییێن گه‌نمی هاتینه چاندن، چونکی چەندین بنەما ل عێراقێ بۆ وەرگرتنا بەرھەمێ گەنمی هه‌نه، بۆ نموونە ل عێراقێ بۆ ھەر دۆنه‌مه‌كا ئه‌ردی رێژه‌كا بەرھەمی هاتییه دیار کرن، ل سەر ئەوی بنەمایی رێژا ھەرێما کوردستانێ ژی دێ هێته دیار کرن.
کەریم سلێمانی گۆت ژی: ل سالا بوری 500 ھزار ته‌نێن گەنمی ژ لایێ حکومەتا عیراقێڤه هاتبوونه وەرگرتن، هه‌روه‌سا ناڤێن ھەموو جۆتیارێن ھەرێما كوردستانێ هاتینه تۆمارکرن.
