د وێ کۆمبوونا ل گەل سەرۆکێ حکومەتا هەرێمی کوردستانێ؛ وەزیرێ دەرڤه‌یێ ئەمریکا ته‌كه‌زی ل سه‌ر بەردەوامییا هاریکارییان بۆ هەرێما کوردستانێ کرییه” ئەڤە د ده‌مه‌كی دایه، كو هەرێما کوردستانێ رووبروو کۆمەكا زۆر یا فشارێن هەرێمی و نێڤدەولەتی بوویە.
روودانێن نوو یێن ل رۆژهه‌لاتا ناڤین و ئالۆزییێن ڤێ ده‌ڤه‌رێ، نەبووینە هۆکار كو ئەمریکا سەرنجا خۆ ل سەر هەرێما کوردستانێ وەکو هه‌ڤپشكه‌كا ستراتیژی لابده‌ت، ل سەر زارێ ئەنتۆنی بلینکن، وەزیرێ دەرڤه‌یێ وی وه‌لاتی سۆزا بەردەوامیدانا هاریکارییان بۆ هەرێما کوردستانێ هاتییه دان.
ل ده‌مێ پێشوازیكرنێ ل مەسرور بارزانی، سەرۆکێ حکومەتا هەرێما کوردستانێ ل ئاڤاهییێ وەزارەتا دەرڤە، ل واشنتۆن دی سی؛ ئەنتۆنی بلینکن، وەزیرێ دەرڤه‌یێ ئەمریکا راگەهاند، پەیوەندییێن وان ل گەل هەرێما کوردستانێ د ئاسته‌كێ بلند دانه، هەروەسا پشته‌ڤانییێ ل هەرێما خۆراگر دکەن د چارچۆڤه‌یێ وێ پەیوەندییا 360 پلەیی یاكو وان ل گەل عێراقێ هەیی، چونکی هەرێم هه‌ڤپشكه‌كا گرنگ بوویە بۆ سەقامگیرییا ڤێ ده‌ڤه‌رێ.
